Daxili siyasət

Ana səhifə

Daxili siyasət

Müsavat başqanının müavini: “AXCP və Müsavatdan kənarda hər hansı birliyin ciddi qüvvəyə çevriləcəyinə qətiyyən inanmıram”

16 may 2011 15:52 (UTC +04:00)

Bakı. Ramil Məmmədli - APA. “Azərbaycanda real siyasi gücə malik olan 2 müxalifət partiyası var – AXCP və Müsavat. Bu partiyalardan kənarda hər hansı birliyin ciddi qüvvəyə çevriləcəyinə qətiyyən inanmıram”. Bunu APA-ya Müsavat Partiyası başqanının müavini Tofiq Yaqublu deyib. O, Azərbaycan Liberal Partiyasının (ALP) lideri Lalə Şövkətin təklifi ilə yaradılması istiqamətində iş aparılan yeni birliyin perspektivinə inanmadığını da qeyd edib: “Bu onların hüquqdur və uğurlar arzulayıram. Amma Azərbaycanda bir reallıq var. Ölkənin əsas müxalifət qüvvələri AXCP və Müsavat Partiyasıdır. Bu partiyalar hazırda İctimai Palatada birləşib. Düşünürəm ki, yeni yaradılan birlik Azərbaycanda siyasi abı-havanı müəyyənləşdirəcək, iqtidara qarşı mövqe qoya biləcək quruma çevrilə bilməyəcək”.

AXCP sədrinin müavini Nurəddin Məmmədli isə APA-ya açıqlamasında müxalifətdə birliklərin yaranmasını təqdir edib: “Bu gün həmin partiyaların bu və ya digər səbəblərdən İctimai Palatada təmsil olunması mümkün olmasa da, perspektivdə şübhə etmirəm ki, biz bir təşkilatda təmsil olunacağıq və bir yerdə mübarizə aparacağıq. Bu kontekstdə yanaşanda ayrı-ayrı partiyalarla əməkdaşlığın qurulması həm vaxt, həm də enerji baxımından itkiyə səbəb olduğundan, bloklar arasındakı ittifaqlara nail olmaq daha əlverişlidir. Yəni gələcəkdə iki birliyin qarşılıqlı əlaqələrinin yaranması perspektivi mümkündür. Ona görə də bu birliyə xeyr-dua veririk və qətiyyən buna qarşı iddialarımız yoxdur”.

Vətəndaş və İnkişaf Partiyasının (VİP) sədri Əli Əliyev isə bildirib ki, müxalifətin yeni birliyinin yaradılması istiqamətində aparılan danışıqlarda AXCP və Müsavat Partiyalarının kənarda qalması məsələsi haqda deyilənlər cəfəngiyatdır: “Müxalifətin birliyi istiqamətində görüşlərimiz olub. Sonra isə Müsavat və Xalq Cəbhəsi partiyalarının rəhbərlərinə yazılı müraciətlər etmişik. Lakin cavab verilməyib. Ancaq müxalifətdəki digər partiyalarla birgə AXCP ilə Müsavat Partiyasının da iştirakı ilə vahid siyasi birlikdə təmsil oluna bilərik”. VİP sədri qeyd edib ki, müxalifətin birlik məsələsini müzakirə etmək mümkündür: “Müxalifət təşkilatlanmayana qədər ciddi siyasi uğur danışmaq yersizdir. Baş verəcək uğursuzluq isə hamımızın payına düşəcək və heç kimin ayrı-ayrılıqda uğuru da olmayacaq. Ona görə də biz müxalifətin hansısa şərtlər altında təşkilatlanmasının yenə də tərəfdarı kimi çıxış edirik”.

Ə. Əliyev onu da bildirib ki, müxalifətdə hələ də kimlərsə monopoliya siyasətini davam etdirir.