Daxili siyasət

Ana səhifə

Daxili siyasət

Vatslav Klaus: “Çexiya Azərbaycanın ərazi bütövlüyünü dəstəkləyir”

17 may 2011 15:00 (UTC +04:00)

APA-nın məlumatına görə, qonaq Azərbaycan parlamentinin inzibati binası, iclas zalı və deputatlar üçün yaradılmış iş şəraiti ilə tanış olub. Çexiya prezidenti Milli Məclisin binasında Heydər Əliyev Xatirə zalına baxıb Fəxri qonaqlar kitabına ürək sözlərini yazıb.

Sonra Çexiya dövlətinin başçısı Milli Məclisin sədri ilə görüşüb.

Spiker O. Əsədov bildirib ki, Azərbaycanla Çexiya arasında əlaqələr yüksələn xətlə inkişaf edir.

Azərbaycanla Çexiya arasında iqtisadi-ticari əlaqələrindən danışan O. Əsədov deyib ki, ötən il ticarət dövriyyəsi 38 milyon ABŞ dolları təşkil etdiyi halda, bu ilin 2 ayında bu rəqəm 48 milyon dollara çatıb: “Bu isə onu göstərir ki, ticarət dövriyyəsini genişləndirmək və iqtisadi əlaqələrimizi inkişaf etdirmək üçün geniş potensial var”.

Bildirilib ki, Azərbaycan zəngin enerji ölkəsidir, regionda həyata keçirilən enerji layihələri çərçivəsində böyük uğurlar qazanıb. Ölkəmiz Avropa İttifaqının enerji təhlükəsizliyinin təmin olunmasında mühüm rol oynayır.

Milli Məclisin sədri dövlətlər arasındakı münasibətlərin inkişafında parlamentlərin rolunu xüsusi qeyd edib, hər iki ölkənin qanunverici orqanında dostluq qruplarının fəaliyyət göstərməsini, deputatların beynəlxalq təşkilatlarda bir sıra məsələlərin müzakirəsi zamanı bir mövqedən çıxış etmələrini yüksək qiymətləndirib.

O. Əsədov ölkəmiz üçün ən ağrılı problem olan Dağlıq Qarabağ münaqişəsindən də danışıb. Çexiyanın problemin sülh yolu ilə, beynəlxalq hüququn norma və prinsipləri əsasında həllinə tərəfdar olacağına əminliyini bildirib.

Prezident V. Klaus deyib ki, Çexiya Azərbaycanla əlaqələrin bütün sahələrdə genişləndirilməsində maraqlıdır. Səfərin əsas məqsədi Azərbaycanla daha yaxından tanış olmaq, bəzi məsələlərə dair fikir mübadiləsi aparmaqdır. O, ölkəsinin Avropa İttifaqının “Şərq Tərəfdaşlığı” Proqramına böyük önəm verdiyini, Azərbaycanı Avropaya inteqrasiyada dəstəklədiyini vurğulayıb.

Dağlıq Qarabağ münaqişəsinə toxunan prezident bildirib ki, Çexiya Azərbaycanın ərazi bütövlüyünü dəstəkləyir: “Ümid edirik ki, münaqişə yaxın vaxtlarda öz ədalətli həllini tapacaq”.

Azərbaycan_Çexiya