Daxili siyasət

Ana səhifə

Daxili siyasət

Sabir Rüstəmxanlı: “Azərbaycanda bəzi siyasətçilər Güney Azərbaycan məsələsinə mövsümü yanaşırlar”

19 may 2011 10:54 (UTC +04:00)

Bakı. Ramil Məmmədli – APA. Dünya Azərbaycanlıları Konqresinin (DAK) Azərbaycan Nümayəndəliyi Güney Azərbaycanda 2006-cı il mayında baş verən hadisələrin V ildönümü ilə bağlı tədbir keçirib. APA-nın məlumatına görə, 2006-cı ilin mayında baş verən etiraz aksiyalarından bəhs edən videoçarxın nümayişindən sonra DAK Azərbaycan Nümayəndəliyinin rəhbəri Səftər Rəhimli hadisələrin xronologiyası haqqında danışıb. O deyib ki, İrandakı türklərin bu şəkildə kütləvi aksiyalar keçirməsinə səbəb illər boyu onlara qarşı edilən təzyiq və təhqirlər olub: ““İran” qəzetində türklərin hamam böcəyinə bənzədilməsi isə bu təhqirlərin kulminasiya nöqtəsi oldu. Hadisələrdən sonra aksiyalarda fəallıq göstərən azərbaycanlılar bir-bir başqa ittihamlarla həbs edildilər”.

DAK həmsədri Sabir Rüstəmxanlı isə Azərbaycan türklərinin kütləvi etirazlarını tarixin yeni mərhələsi adlandırıb: “Bu hadisələr göstərdi ki, İrandakı türklər rejimlə barışmayıblar və ideoloji baxışlarını unutmayıblar”.

S. Rüstəmxanlı qeyd edib ki, Azərbaycanda bəzi siyasətçilər Güney Azərbaycan məsələsinə mövsümü şəkildə yanaşırlar: “DAK isə bu işi özünün əsas hədəfi hesab edir”. O, gəncləri bu məsələlərə aktiv yanaşmağa və Güney Azərbaycandan olan həmyaşıdları ilə mütəmadi əlaqə qurmağa çağırıb: “Azərbaycanın bütövləşməsi qaçılmazdır”.

DAK Daimi Şurasının sədri Əjdər Tağızadə, DAK həmsədrinin humanitar məsələlər üzrə müavini Xəzər Emin, Azərbaycanın İrandakı keçmiş səfiri Əlyar Səfərli və digər natiqlər də İranda insan hüquqlarının pozulmasından, Azərbaycan türklərinin ana dilində təhsil imkanlarına məhdudiyyət qoyulmasından bəhs ediblər.