Daxili siyasət

Ana səhifə

Daxili siyasət

Bakıda “Dəyişən dünya və Güney Azərbaycan Milli Azadlıq Hərəkatı” mövzusunda konfrans keçirilib

19 may 2011 13:08 (UTC +04:00)

Bakı-APA. Bu gün “Caspian Plaza”nın konfrans zalında Azərbaycan Milli İstiqlal Partiyasının təşkilatçılğı ilə Güney Azərbaycan Milli Azadlıq Hərəkatının 22 may 2006-ci ildə başlanan yeni mərhələsinin 5-ci ildönümünə həsr olunan “Dəyişən dünya və Güney Azərbaycan Milli Azadlıq Hərəkatı” mövzusunda konfrans keçirilib.

APA-nın məlumatına görə, konfransı giriş sözü ilə açan AMİP baş katibi Arzuxan Əlizadə 5 il əvvəl Güney Azərbaycanda başlanan Milli Azadlıq Hərəkatı özünün yeni mərhələsinə qədəm qoyduğunu deyib: “Azadlıq ideallarına sadiq olan və bu yolda gərgin mücadilələr verən Güneyli soydaşlarımız İranın eyni adlı rəsmi qəzetində təhqirlərə məruz qalmasına dözməyərək etiraz səsini ucaldaraq rejimin repressiyalarına və basqılarına məhəl qoymadan öz haqları uğrunda meydanlara atıldı. Bu gün də hər cür repressiyalara, sui-qəsdlərə baxmayaraq Milli Azadlıq Hərəkatı davam edir və əminik ki, bu mübarizə tezliklə öz bəhrəsini verəcək”.

Daha sonra tədbirdə 22 may 2006-cı il Güney Azərbaycanda baş verən hadisələrə həsr olunmuş videoçarx və şəkillər nümayiş olunub.

Tədbirdə çıxış edən AMİP mətbuat və təbliğat katibi Əli Orucov dünyada və regionda cərəyan edən hadisələrin Güney Azərbaycan məsələsinə göstərə biləcəyi təsirnə toxunub: “Dünyada və regionda cərəyan edən proseslər, İran rejiminin beynəlxalq sülh və təhlükəsizlik üçün ciddi təhdidə çevrilməsi, eyni zamanda bu dövlətin tədric və izolyasiyaya salınması, ən əsası isə millətimizin özünə güvəninin daha da artması illərdən bəri arzusunda olduğumuz Bütöv Azərbaycan ideyasının gerçəkləşməsinə zəmin yaratmaqdadır”.

Müzakirələr zamanı Müsavat Partiyası Ali Məclisinin sədri Arzu Səmədbəyli, Güney Azərbaycan analitik informasiya mərkəzinin rəhbəri Əlirza Amanbəyli, Bütöv Azərbaycan Birliyi Rəyasət Heyətinin sədri Aqil Səmədbəyli, Böyük Azərbaycan Partiyasının sədri Elşad Musayev, AMİP sədri Yusif Bağırzadə və digər natiqlər mövzu ilə bağlı vacib problemlərə toxunublar.

Konfransın sonunda çıxış edən AMİP lideri Etibar Məmmədov bu prosesin davamlı və gündəlik fəaliyyətə keçirilməsinin zəruri olduğunu vurğulayaraq Azərbaycanda siyasətlə məşğul olan hər bir şəxsin gündəliyində Cənubi Azərbaycan məsələsinın öndə olmasını vacib sayıb: “Hər bir Azərbaycan siyasətçisi bu məsələni öz gündəliyinə daxil etməklə bərabər başlanan prosesin Azərbaycanın nəzarəti altında olması istiqamətində fəaliyyət göstərməlidir. Biz Güneydəki bacı və qardaşlarımızı özbaşına buraxa bilmərik ki, bu mübarizədə onlar fars rejimi ilə tək qalsınlar. Təəssüf ki, həmin proses hamının beynində olan prosesə çevrilməyib. Bu proses dalğavari gəlir, yaddaşlarda möhkəmlənir. Biz bunu böyük axına çevirmək istiqamətində fəaliyyət göstərməliyik”.

Güney Azərbaycan məsələsinin beynəlxalq ictimaiyyət qarşısında əsas problemlərdən biri kimi qoyulmasına nail olunması üçün daha artıq səylər göstərilməsinə toxunan AMİP lideri bildirib ki, əsas vəzifələrdən biri Güney Azərbaycan məsələsinin dünyanın gündəminə salmaqdır: “Lakin 5 il ərzində bu vəzifənin öhdəsindən gələ bilməmişik. Ona görə də bu istiqamətdə hamını düşünməyə arzu edirəm. Hər kəs qəlbində olan bu ideyanın həyata keçməsi istiqamətində əməli fəaliyyət göstərməli, ümummilli məsələlərin həlli üçün bir addım atmalıdır. Mən arzu edirəm ki, bu hərəkatlar da nəticəli olsun, hamımız böyük bir ideala qovuşmağımız münasibəti ilə bir-birimizi təbrik edək”.