Daxili siyasət

Ana səhifə

Daxili siyasət

BAXCP “Eurovision-2012” müsabiqəsi başa çatanadək bütün siyasi qüvvələri razılaşdırılmamış aksiyalara moratorium qoymağa çağırır

23 may 2011 10:03 (UTC +04:00)

Partiyanın mətbuat xidmətindən APA-ya verilən məlumata görə, iclasda qərarların icrası, ictimai-siyasi vəziyyət və cari məsələlər müzakirə olunub.

BAXCP İdarə Heyətinin müzakirəsinə çıxarılan ilk məsələ 2012-ci ildə ölkənin paytaxtında keçiriləcək "Eurovision-2012" mahnı müsabiqəsi ilə bağlı olub. Azərbaycan təmsilçilərinin "Eurovision-2011" mahnı müsabiqəsində qələbə qazanmalarını yüksək dəyərləndirən BAXCP İdarə Heyəti Azərbaycan üçün "Eurovision-2011" mahnı müsabiqəsində qazanılan uğurun və nəticədə "Eurovision-2012" müsabiqəsinə ev sahibliyi etmək hüququnun əldə olunmasının müstəsna önəm daşıdığını bildirib.

BAXCP İdarə Heyəti hesab edir ki, "Eurovision-2012" mahnı müsabiqəsinin yüksək səviyyədə təşkili və keçirilməsi Azərbaycan üçün bir sıra istiqamətlərdə yeni və geniş perspektivlər aça bilər: "Bu baxımdan ölkənin bütün siyasi qüvvələrini bu hadisəyə məsuliyyətlə yanaşmağa çağırırıq. BAXCP İdarə Heyəti hesab edir ki, "Eurovision-2012" mahnı müsabiqəsi başa çatanadək bütün siyasi qüvvələr ölkədə gərginlik yarada biləcək davranışlara yol verməməli, bir il müddətinə zorakılığa, qarşıdurmalara, həbslərə yol açacaq bütün razılaşdırılmamış aksiyalara moratorium qoymalıdırlar. Biz nəyin bahasına olursa-olsun, "Eurovision-2012" müsabiqəsinin Azərbaycanda keçirilməsindən əndişələnən və ölkəmizin əleyhinə bütün istiqamətlərdə qara piar kampaniyası aparmaqla müsabiqənin gətirə biləcəyi pozitiv dividentlərin üzərinə öncədən kölgə salmağa çalışan xarici qüvvələrə qarşı vahid mövqedə dayanmalı, müsabiqənin yüksək səviyyədə təşkilinə və keçirilməsinə öz töhfəmizi verməliyik".

BAXCP İdarə Heyətinin müzakirəyə çıxarılan digər məsələ isə partiyanın Ali Məclisinin növbəti sessiyasının keçirilməsi ilə bağlı olub. İdarə Heyətinin qərarına əsasən, BAXCP Ali Məclisinin növbəti sessiyası iyunun 11-də, partiyanın mərkəzi mənzil-qərargahında keçiriləcək.

BAXCP