Daxili siyasət

Ana səhifə

Daxili siyasət

Qurban Məmmədov: “İctimai Palatanın bazasında müxalifətin birləşməsini təmin etməliyik”

25 may 2011 16:00 (UTC +04:00)

Bakı. Ramil Məmmədli – APA. “Vətəndaş Hərəkatı Forumu tərəfindən bizə verilən səlahiyyətə əsasən Klassik Xalq Cəbhəsi, Ümid, Liberal, Vətəndaş və İnkişaf, Xalq Cəbhəsi, Müsavat, Demokrat partiyalarının sədrləri ilə görüşdüm. Bu partiya rəhbərlərinin hamısı bizim şərtlərimizlə razılaşdılar və “səkkizlər”in zirvə görüşünün keçirilməsi təklifini müsbət cavablandırdılar. Yalnız Müsavat Partiyasının başqanı İsa Qəmbər görüşdə iştirak etməyə razılıq vermədi”. Bu açıqlamanı APA-ya Vətəndaş Hərəkatı Forumunun təmsilçisi Qurban Məmmədov verib. O bildirib ki, İ. Qəmbər Ümid Partiyasının sədri İqbal Ağazadənin deputat mandatından imtina etməsindən sonra “səkkizlərin” görüşünün baş tutmasının mümkün olduğunu söyləyib: “İqbal bəyin arqumenti isə ondan ibarətdir ki, İsa Qəmbərin və Əli Kərimlinin vaxtilə atdığı addımları bu gün o atıb”.

Q. Məmmədovun sözlərinə görə, hər kəsin mövqeyi diqqətə alınacaq: “İctimai Palatanın son mitinqi də onu da göstərdi ki, Azərbaycan xalqı kütləvi səviyyədə müxalifətin aksiyalarına qoşulmur. Bunun iki səbəbi ola bilər. Birincisi, xalq iqtidardan razıdır və biz hakimiyyət haqda səhv mövqedəyik, ikincisi isə müxalifət Azərbaycan xalqının etibarını itirib və bizə inanmır. Belə qənaətə gəlmişik ki, İctimai Palatanın bazasında müxalifətin birləşməsini təmin etməliyik. İlkin təklifimiz budur ki, həmin qurumun rəhbərliyində partiya rəhbərliyindən əlavə ən azı müstəqil ziyalılardan ibarət 9 nəfər təmsil olunmalıdır. Bunun üçün zirvə görüşü vacibdir. Yaxın bir neçə günə İsa Qəmbər də təklifi cavablandıracaq. Bundan sonra digər proseslər - kimin qərəzli və ya qərəzsiz olduğu üzə çıxacaq. İnanırıq ki, müxalifətin birliyinə nail olacağıq”.

Q. Məmmədov qeyd edib ki, Vətəndaş Hərəkatı Forumu tərəfindən müxalifətdə təmsil olunan bir sıra partiyalarla görüşüb danışıqlar aparmaq səlahiyyəti onunla yanaşı KXCP-dən olan Akif Hüseynova da verilib: “Əsas təklifimiz odur ki, İctimai Palataya qəbul açıq qapı siyasəti ilə həyata keçirilsin və kütləvi qəbula imkan yaradılsın. Yəni kiminsə qəbul edilib-edilməməsi fərdlərin iradəsi əsasında olmasın. Həmçinin, kütləvi aksiyalara təşkilatlanma bitənə qədər moratorium qoyulsun”.