Daxili siyasət

Ana səhifə

Daxili siyasət

Əli Əhmədov YAP Binəqədi rayon təşkilatının fəalları ilə görüşüb

26 may 2011 13:59 (UTC +04:00)

Bakı. Ramil Məmmədli – APA. Bu gün Yeni Azərbaycan Partiyasının (YAP) sədrinin müavini, icraçı katib Əli Əhmədov partiyanın Binəqədi rayon təşkilatının fəal gəncləri ilə görüş keçirib.

APA-nın məlumatına görə, əvvəlcə Əli Əhmədov və partiyanın icraçı katibin müavini Mübariz Qurbanlı YAP Binəqədi rayon təşkilatına yeni üzv olan gənclərin bir qisminə üzvlük vəsiqəsi təqdim ediblər. Sonra Ə. Əhmədov deyib ki, təkcə may ayı ərzində Binəqədi rayonu üzrə 400 nəfərə yaxın şəxs YAP-a üzv olub ki, bunların da əksəriyyəti gənclərdir: Gənclərin YAP-ı seçməsi özlərinin siyasi taleyini bu partiya ilə bağlamaq niyyəti ilə bağlıdır. “Bununla da azərbaycanlı gənclər bu qurumda özlərini təsdiqləmək üçün meydan əldə etmiş olurlar. Partiyanın üzvlərinin 40 faizinin gənclər olması da xüsusi qeyd olunmalıdır”. YAP-ı Azərbaycanın ən qüdrətli partiyası adlandıran Ə. Əhmədov dövlətin gənclər siyasətinə də toxunub: “Azərbaycan gəncliyi dövlətə bağlı və Heydər Əliyev ideyaları uğrunda mübarizə aparan cəmiyyətin çox dəyərli kəsimidir”.

Ə. Əhmədov deyib ki, Azərbaycan gəncliyinin qarşısında bu gün geniş perspektiv açılıb və həyat səviyyəsi yüksəlib, o cümlədən 20 il öncə gəncliyin rastlaşdığı problemlərdən də uzaqdır: “Biz istəyirik ki, Azərbaycanın gələcəyinin qurulması prosesində gənclər fəal olsunlar və ictimai-siyasi sabitliyin qorunmasında iştirak etsinlər. Sabitlik olmayan yerdə inkişafdan söhbət gedə bilməz. Bütün inkişaf etmiş ölkələrin əsasında sabitlik durur. Azərbaycan prezidentinin yürütdüyü siyasət inkişaf üçün geniş imkanlar açıb”. Ə. Əhmədov Azərbaycanın beynəlxalq aləmdəki yeri və rolu haqda da danışıb.

Bundan sonra tədbirdə iştirak edən gənclərin fikirləri dinlənilib və onları maraqlandıran suallar cavablandırıb.