Daxili siyasət

Ana səhifə

Daxili siyasət

Pənah Hüseyn İctimai Palatada islahatlar aparmağı təklif edib

27 may 2011 14:57 (UTC +04:00)

Bakı. Pərvin Abbasov-APA. “Bu gün Azərbaycanda siyasətçilər iki qrupa bölünüb: İctimai Palatada olanlar və orada təmsil olunmayaraq bu quruma qarşı danışan, mübarizə aparan, hətta böhtan atanlar”. APA-nın xəbərinə görə, bu fikirləri İctimai Palatanın (İP) Koordinasiya Şurasının üzvü, Müsavat başqanı İsa Qəmbər İP-in sessiyasındakı çıxışında deyib.

O, bu gün İP-in növbəti mitinqin yeri və vaxtı ilə bağlı qərar verilməsini gözlədiyini bildirib. İ. Qəmbər aksiya ilə bağlı Bakı Şəhər İcra Hakimiyyətinə müraciət olunmasını, icazə verilməyəcəyi təqdirdə aksiyanın Bakının mərkəzində keçirilməsini təklif edib.

İP Koordinasiya Şurasının (KŞ) üzvü Pənah Hüseyn çıxışında qurumda islahatlar aparılmasını təklif edib. O deyib ki, İP-in Nizamnaməsi hazırlanaraq qəbul olunmalı və KŞ-nın üzvləri gizli səsvermə nəticəsində yenidən seçilməlidir. P. Hüseyn indidən İP-in prezidentliyə namizədliyinin müəyyənləşdirilməsini və “kölgə kabineti” yaradılmasını təklif edib. O, İP Koordinasiya Şurasının təqdimatı ilə “Demokratiyaya keçidin Yol Xəritəsi”nin də müzakirəyə çıxarılacağını bildirib.

Müsavatçı İP üzvü Mustafa Hacıbəyli çıxışında iyunun 19-da aksiya keçirilməsinin tərəfdarı olduğunu deyib: “Lakin bu ay bizim mitinq keçirməməyimiz əleyhimizə oldu”.

M. Hacıbəli “Yol xəritə”sinin adının dəyişdirilərək “platforma” olmasını təklif edib. O, P. Hüseynin “kölgə kabineti”nin yaradılması ilə bağlı fikirlərinin isə ziyanlı olduğunu söyləyib.

P. Hüseyn isə çıxışında onunla razılaşmadığını bəyan edib.

İP üzvü Ərəstun Oruclu “Yol xəritəsi” layihəsinin təkmilləşdirilməsinə ehtiyac olduğunu söyləyib.

Sonda “Yol xəritəsi” səsvermə nəticəsində müzakirələrə qəbul olunub.