Daxili siyasət

Ana səhifə

Daxili siyasət

Azərbaycan prezidenti İlham Əliyev 28 May - Respublika Günü münasibətilə rəsmi qəbulda iştirak edib

27 may 2011 21:08 (UTC +04:00)

Bakı-APA. Mayın 27-də “Buta” sarayında 28 May - Respublika Gününə həsr olunmuş rəsmi qəbul təşkil edilib.
Azərbaycan prezidenti İlham Əliyev rəsmi qəbulda iştirak edib. Dövlət başçısı rəsmi qəbulda nitq söyləyib.
Prezident İlham Əliyev Respublika Günü münasibətilə Azərbaycan xalqını təbrik edərək, 93 il bundan əvvəl müsəlman Şərqində ilk dəfə olaraq demokratik respublikanın yaranmasını tarixi hadisə kimi səciyyələndirib. Dövlət başçısı bildirib ki, Azərbaycan dövləti və xalqı Azərbaycan Xalq Cümhuriyyətinin qurucularının xatirəsinə böyük hörmətlə yanaşır. Prezident İlham Əliyev cümhuriyyətin cəmi iki il yaşadığını, bundan sonra sovet dövrünün başlandığını qeyd edib və deyib ki, bütün çətinlik və ideoloji çərçivələrə baxmayaraq, o dövr də Azərbaycan üçün uğurlu olub.
İyirmi il əvvəl yenidən bərpa olunmuş müstəqilliyimizin ilk illərinin çətin keçdiyini, o vaxt respublikamızda gedən proseslərin ölkəmiz üçün böyük təhlükə olduğunu deyən prezident İlham Əliyev həmin dövrdə hökm sürən anarxiya, xaos, hakimiyyətsizlik və özbaşınalığın Azərbaycanı iflic vəziyyətinə saldığını diqqətə çatdırıb.
Dövlət başçısı bildirdi ki, Azərbaycan xalqının tələbi ilə yenidən hakimiyyətə qayıdan ulu öndər Heydər Əliyevin səyləri nəticəsində qısa müddət ərzində bütün xoşagəlməz hallara son qoyuldu. 1993-cü ildən başlayaraq Azərbaycanda sabitlik və inkişaf dövrü başlayıb. Dövlətçiliyimizin əsasları da məhz 1993-cü ildən sonra formalaşıb.
Prezident İlham Əliyev 1993-2003-cü illərin Azərbaycanın inkişafı üçün həlledici illər olduğunu deyərək, bundan sonrakı dövrdə də ölkəmizin böyük nailiyyətlərə imza atdığını və bunun statistik rəqəmlərdə də öz əksini tapdığını qeyd edib. Bu gün Azərbaycanın beynəlxalq aləmdə mövqeyi daha da möhkəmlənib, regional müstəvidə təsir imkanlarımız artıb. Siyasi islahatlarla yanaşı iqtisadi sahədə böyük uğurlar əldə edilib. Son 7-8 ildə ümumi daxili məhsul və sənaye istehsalı təxminən 3 dəfə artıb, yoxsulluq 5 dəfə azalıb, ölkəmizdə 1 milyona yaxın yeni iş yeri açılıb. Prezident İlham Əliyev Azərbaycan tarixində ilk dəfə olaraq dövlət büdcəsinin 20 milyard dollara çatdığını bildirib.
Dövlət başçısı qeyd etdi ki, son illər Azərbaycanda uğurlu enerji siyasəti aparılıb. Azərbaycan öz enerji təhlükəsizliyini tam şəkildə təmin edib, digər ölkələrin də enerji təhlükəsizliyinə töhfə verir.
Azərbaycan xalqının rifah halının yaxşılaşdırılması sahəsində də xeyli işlərin görüldüyünü deyən dövlət başçısı ölkə qarşısında duran əsas problemin Ermənistan-Azərbaycan, Dağlıq Qarabağ münaqişəsinin həlli məsələsi olduğunu söyləyib. Bildirib ki, Azərbaycan Dağlıq Qarabağın müstəqilliyinə heç vaxt yol verməyəcək.
Prezident İlham Əliyev ölkəmizin sosial-iqtisadi inkişafı və hüquqi-demokratik dövlət quruculuğu prosesinin bundan sonra da uğurla davam edəcəyini diqqətə çatdıraraq Azərbaycan xalqını bir daha Respublika Günü münasibətilə təbrik edib.
Rəsmi qəbul incəsənət ustalarının maraqlı konsert proqramı ilə davam edib.