Daxili siyasət

Ana səhifə

Daxili siyasət

İctimai Palatanın Koordinasiya Şurası Pənah Hüseyndən “kölgə kabineti” ilə bağlı müzakirələrin dayandırılmasını tələb edib

03 iyun 2011 07:50 (UTC +04:00)

Bu barədə APA-ya İP KŞ üzvü Ədalət Yusifov məlumat verib. O bildirib ki, iclasda “kölgə kabineti” ilə bağlı müzakirələrin ziyanlı olduğu və İP-ə aid olmadığı vurğulanıb: “Həmçinin, sosial şəbəkələrdə yayılan “kölgə kabineti” siyahısının da İctimai Palataya aid olmadığı qeyd olundu. Məsələnin bu şəkildə davam etdirilməsinin ziyanlı olduğu İP KŞ üzvlərinin hamısının diqqətinə çatdırıldı”.

Ə. Yusifov bildirib ki, toplantıda “kölgə kabineti” ideyasını vermiş İP KŞ üzvü Pənah Hüseyndən bu istiqamətdə aparılan müzakirələrin dayandırılması tələb olunub: “Pənah bəy də İctimai Palatanın Koordinasiya Şurasının qərarına hörmətlə yanaşdığı və bundan sonrakı təkliflərini Koordinasiya Şurasının üzvü kimi yox, İctimai Palatanın üzvü kimi verəcəyini bildirdi”.

İP KŞ üzvü Pənah Hüseyn isə APA-ya açıqlamasında onun qarşısına ”kölgə kabineti” mövzusunda müzakirələrin davam-etdirilməməsi barədə hansısa tələbin qoyulmadığını bildirib: “Söhbət “facebook”da anonim şəxs və ya şəxslər tərəfindən verilən informasiyalardan gedir. Anonim adamdan da nəyi tələb etmək olar? Əgər Ədalət bəy belə bir şey deyirsə, onun fikrini verin. Ancaq mənə belə bir şey məlum deyil”.

Xatırladaq ki, P. Hüseyn İP-də islahatların aparılması, o cümlədən “kölgə kabineti”nin yaradılması təklifini ilk dəfə İP-in mayın 27-də keçirilən sessiyasında irəli sürüb. Lakin İP-ə daxil olan Müsavat Partiyası və AXCP funksionerləri bu ideyanın əleyhinə çıxıb.