Daxili siyasət

Ana səhifə

Daxili siyasət

Sərdar Cəlaloğlu: “Qurban Məmmədovun müxalifəti birləşdirmək təşəbbüsü çox gülməli, qeyri-ciddi, siyasi baxımdan qeyri-etik hərəkətdir”

06 iyun 2011 09:36 (UTC +04:00)

Bakı. Ramil Məmmədli - APA. “Mənimlə danışıqlar aparmaq istəyən Qurban Məmmədovu nə görmüşəm, nə də danışmışam”. Bunu APA-ya Azərbaycan Demokrat Partiyasının (ADP) sədri Sərdar Cəlaloğlu deyib. S. Cəlaloğlu bildirib ki, ayrı-ayrı adamların 10-15 partiyanı idarə etmək təşəbbüsü siyasi etika baxımdan düzgün deyil: “Partiyalarda kifayət qədər intellektual və optimal qərar qəbul etməyə qadir şəxslər var”.

ADP sədri bəyan edib ki, Vətəndaş Hərəkatı Forumun nümayəndəsi kimi Qurban Məmmədovun təşəbbüsü çox gülməli, qeyri-ciddi, siyasi baxımdan qeyri-etik hərəkətdir: “Beynəlxalq təşkilatların da bu istiqamətdə təklifləri olub. Yəni beynəlxalq təşkilatların təşəbbüsü ilə birləşməyən müxalifət hansısa Qurban Məmmədovun sözü ilə birləşə bilərmi? Əlbəttə yox. Lalə Şövkətin, Sərdar Cəlaloğlunun və digər partiya liderlərinin ideya və təşəbbüsü ilə müxalifətin birliyi alınmadısa, necə düşünürsünüz, Qurban Məmmədovun təklifi ilə birlik alınar? Eyni ideyanı götürüb dövriyyəyə buraxıblar. AXCP və Müsavat Partiyasından kənarda olan birlik müxalifətin vahid güc mərkəzi kimi çıxış edə bilməz. Ona görə də hadisələrə siyasi cəhətdən yanaşaq. Təəssüf ki, AXCP və Müsavat Partiyasının atdığı addımlar dəyişikliyə cəhdin imitasiyasıdır. Bunun da heç bir perspektivini görmürəm. Hələlik bu iki partiya siyasi reallıqları kifayət qədər aydın dərk edə, hadisələrə düzgün qiymət verə bilmir. Ancaq bu da bizim reallığımızdır və bu vəziyyəti dəyişdirmək üçün danışmalıyıq. Həm də bu vəziyyətlə barışmağı bacarmalıyıq. Bu reallığı dəyişdirə bilmiriksə, irreal ideya veririksə bunun da cəmiyyətə bir xeyri olacağını düşünmürəm”.

qurban_məmmədov