Daxili siyasət

Ana səhifə

Daxili siyasət

Qurban Məmmədov: “Nəticə bir həftəyə məlum olacaq”

08 iyun 2011 09:47 (UTC +04:00)

Bakı. Ramil Məmmədli - APA. “Müxalifət partiyaları mütləq ortaq məxrəcə gələcək. Azərbaycan müxalifətinin birləşməsi sosial sifariş, tarixi zərurətdir. Bunun qarşısını nə Qurban Məmmədov, nə Sərdar Cəlaloğlu, nə İsa Qəmbər, nə İqbal Ağazadə ala bilər. Yekun nəticə müəyyən məsələlər aydınlaşandan sonra yaxın 1 həftə ərzində bəlli olacaq”. Bunu APA-ya açıqlamasında Vətəndaş Hərəkatı Forumunun təmsilçisi Qurban Məmmədov deyib.

Onun sözlərinə görə, ötən gün forumun nümayəndəsi ilə Sərdar Cəlaloğlu arasında görüş keçirilib. S. Cəlaloğlu təşəbbüslə razılaşdığını və danışıqlar aparmaq üçün toplantıda iştirak etməyə hazır olduğunu deyib: “Partiya liderləri müsbət mövqelərini açıqlayıblar. İnanıram ki, mayın 10-na kimi İctimai Palata da bu məsələ ilə bağlı öz müsbət mövqeyini bildirəcək”. Q. Məmmədov bildirib ki, forumunun müxalifət partiyalarını birləşdirmək cəhdini bitmiş hesab etmək olmaz: “Biz müxalifəti birləşdirməkdə qərarlıyıq və mütləq birliyə nail olacağıq. Əli Kərimlinin də, Lalə Şövkətin də, Mirmahmud Mirəlioğlunun da, İsa Qəmbərin də birləşmək fikri var. Bu istiqamətdə İqbal Ağazadə də, Sərdar Cəlaloğlu da, Əli Əliyev də müsbət mövqelərini bildiriblər. Sadəcə olaraq, arada müəyyən anlaşılmazlıqlar var. Çalışacağıq bunu aradan qaldıraq. Yox, kimsə iqtidar tərəfindən idarə olunacaq və müxalifətin birləşməsinə imkan verməyəcəksə, biz onları kənarda qoyub real müxalifət qüvvələrinin birlikdə olmasına nail olacağıq”.

Azərbaycan Demokrat Partiyasının (ADP) sədri Sərdar Cəlaloğlu APA-ya forumun nümayəndəsinin ötən gün onunla görüşdüyünü təsdiqləyib: “Vətəndaş Hərəkatı Forumu müxalifətin toplantısını keçirməyi və bu tədbirə bütün partiyaları dəvət etməyi planlaşdırır. Kim gəlməyəcəksə, elan edəcəklər ki, müxalifətin bir araya gəlməsini istəməyən həmin qüvvədir. Mən görüşdə iştiraka etiraz etməmişəm, həmin yığıncağa qatılacağam”.