Daxili siyasət

Ana səhifə

Daxili siyasət

KXCP-nin icazəsiz aksiyalardan imtina etməsini İP-də olan digər partiyalar birmənalı qarşılamır

09 iyun 2011 14:20 (UTC +04:00)

Bunu APA-ya açıqlamasında İctimai Palataya (İP) daxil olan AXCP sədrinin müavini Fuad Qəhrəmanlı deyib. F. Qəhrəmanlı KXCP-nin İP-in razılaşdırılmamış aksiyalarında iştirakdan imtinasına münasibət bildirərkən bildirib ki, İP-də təmsilçilik partiya prinsipi ilə müəyyənləşdirilmir: “KXCP-nin qərarı yalnız KXCP-nin özünə aiddir. Bu günə qədər keçirilən aksiyalarda əsasən AXCP, Müsavat Partiyası və İP-ə daxil olan üzvlər iştirak edib. Ona görə də KXCP-nin bu qərarı aksiyanın keçirilməsinə hər hansı formada təsir göstərməyəcək”.

İP-in katibi, Müsavat Partiyası başqanının müavini Gülağa Aslanlı isə APA-ya deyib ki, KXCP iyunun 19-da qurultay keçirməyi nəzərdə tutduğundan, razılaşdırılmamış aksiyada iştirakdan imtina edib: “Aksiyaya icazə verilməsə, KXCP-nin qurultay nümayəndələrinin razılaşdırılmamış aksiyada iştirak etməsi onlara problem yarada bilər. Onlar belə qərara gəliblər ki, aksiya ilə bağlı razılaşma olmasa, partiya üzvlərinə aksiyada iştirakla bağlı sərbəstlik versinlər”.

KXCP-nin Təşkilat şöbəsinin müdiri Xəzər Teyyublu isə APA-ya deyib ki, təmsil olunduğu partiya iyun ayında qurultay keçirməyi nəzərdə tutusa da, hələlik dəqiq tarix müəyyənləşdirilməyib.

X. Teyyublu F. Qəhrəmanlının söylədiyi “Bu günə qədər keçirilən aksiyalarda əsasən AXCP, Müsavat Partiyası və İP-ə daxil olan üzvlər iştirak edib” fikirlərinə də münasibət bildirib: “İctimai Palatanın həm 2 aprel, həm də 17 aprel mitinqlərində KXCP üzvləri aktiv iştirak edib. İP-in Bak Şəhər İcra Hakimiyyətinə iyunun 19-na təyin etdiyi aksiya ilə bağlı müraciətinə KXCP nümayəndəsi də imza atdı. KXCP hesab edir ki, icazəli mitinqlərə getmək lazımdır. Bu cür mitinqə daha çox elektoratı cəlb etmək mümkündür. İyunun 19-na təyin olunmuş aksiyaya Bakı Şəhər İcra Hakimiyyətinin icazə verməyəcəyi halda, aksiyada iştirak etməməklə bağı mövqeyi düzgün sayırıq. Aksiyaya icazə verilsə, KXCP fəallıq nümayiş etdirəcək”.

İP