Daxili siyasət

Ana səhifə

Daxili siyasət

Milli Məclisin növbədənkənar iclasında deputatlar cari məsələlərə bağlı çıxış ediblər

10 iyun 2011 10:09 (UTC +04:00)

APA-nın məlumatına görə, iclas Azərbaycanın dövlət himin oxunması ilə açılıb. İclasda cari məsələlərin müzakirəsində çıxış edən deputat Fuad Muradov fəaliyyəti dayandırılmış Azərbaycan Beynəlxalq Universitetində tələbələrin üzləşdiyi problemlərdən danışıb. O, qeyd edib ki, gələcəkdə bu kimi problemlərin ortaya çıxmaması üçün özəl universitetlərlə bağlı qanunvericiliyə dəyişiklər etmək lazımdır.
Deputat İqbal Ağazadə isə həbs olunmuş Bəxtiyar Hacıyevin azad edilməsi təklifi ilə çıxış edib. O, bildirib ki, B. Hacıyev alternativ xidmətdən istifadə etmək istəsə də, bu qanunun olmaması problemlər yaradıb. İ. Ağazadə Türkiyədə həbs edilmiş Qarabağ uğrunda döyüşlərdə iştirak etmiş Yusuf Ziya Arpacığın həbsinə də diqqət yönəldib. O, keçmiş Qarabağ döyüşçüsünün həbsdən azad edilməsi üçün Milli Məclisin Türkiyə tərəfinə müraciət göndərməsini təklif edib.
Millət vəkili Fazil Mustafa da özəl universitetlərlə bağlı qanunvericiliyin təkmilləşdirilməsinin zəruriliyindən danışıb. O, həmçinin Xəzər dənizinin sahillərinin vətəndaşlar tərəfindən hasarlanmasını doğru hesab etmədiyini də deyib. F. Mustafa bildirib ki, bu dünyada mövcud olmayan haldır.
Deputat Siyavuş Novruzov isə İqabal Ağazadənin Bəxtiyar Hacıyevin əfv edilməsi ilə bağlı qaldırdığı təklifə münasibət bildirib. Deputat deyib ki, hələ istintaq getdiyi halda kimisə əfv etmək mümkün deyil: “Alternativ xidmətə gəlincə, dini və ya digər baxışlarına görə bu xidmətdən istifadə etmək olar. Avropada cinsi azlıqlar hərbi xidmət çəkə bilmirlər. Hansısa müəllimin uşağı hərbi xidmətə getmirsə, 5-6 il cəza çəkir. Kimsə göydən zənbillə düşməyib”.
Deputat Sabir Rüstəmxanlı ali təhsil alan şəxslərin işlə təmin olunması məsələsinə toxunub. O, xaricdə təhsil alan Azərbaycan gənclərinin ölkəyə qayıtdıqdan sonra problemlə üzləşdiklərini bildirib.
Fərəc Quliyev isə bildirib ki, Qarabağ münaqişəsinin həlli yeni mərhələyə keçib və parlament də bu məsələyə öz töhfəsinin verməlidir. Deputat bunla əlaqədar Qarabağ Komissiyasının yaradılmasının vacibliyini qeyd edib.
Vitse-spiker Bahar Muradova isə deputat seçildiyi Füzuli rayonunda bir neçə gün əvvəl baş verən təbii fəlakətdən danışıb. O, qeyd edib ki, son vaxtlar Füzulidə ciddi quruculuq işlərinə start verilsə də, təbii fəlakət bu işlərin üstündən xətt çəkib: “Demək istədiyim odur ki, icbari sığorta haqqında qanun qəbul etsək də, belə fəlakətlərdən nəticə çıxarmırıq. Mən burada buna cavabdeh olan qurumların fəaliyyətsizliyini xüsusilə qeyd edərdim”.
B. Muradova Qarabağ məsələsi ilə bağlı yeni mərhələnin başladığını bildirib. Vitse-spiker qeyd edib ki, belə məqamda hər bir ictimai xadim, hər bir mütəxəssis bu məsələyə öz töhfəsini verməlidir.
Qeyd edək ki, bu gün keçirilən iclasda 24 məsələ müzakirə olunacaq.