Daxili siyasət

Ana səhifə

Daxili siyasət

Azərbaycanın şimal-qərb bölgəsində 15 iyun-Milli Qurtuluş günü qeyd edilib

14 iyun 2011 17:47 (UTC +04:00)

Qax. Vüqar Heydərov-APA. Azərbaycanın şimal-qərb bölgəsində 15 iyun-Milli Qurtuluş günü qeyd edilib. APA-nın yerli bürosunun məlumatına görə, 15 iyun- Milli Qurtuluş Gününün 18-ci ildönümü münasibəti ilə Balakən, Zaqatala, Qax və Şəki rayonlarında bir sıra silsilə tədbirlər keçirilib. Qax RİH-i aparatından APA-ya verilən məlumata görə, rayon rəhbərliyi və ictimaiyyətin nümayəndələri mərkəzi meydanda Heydər Əliyevin abidəsi önünə gül dəstələri düzərək ulu öndərin xatirəsini ehtiramla yad edib. Bu münasibətlə təşkil olunan tədbirdə qeyd olundu ki, 18 il əvvəl Heydər Əliyevin yenidən siyasi hakimiyyətə qayıdışını Azərbaycanın ən yeni tarixində uğurlu mərhələnin başlanğıcı hesab etmək olar. Belə ki, Azərbaycan xalqı ikinci dəfə tarixi nailiyyətə-dövlət müstəqilliyinə qovuşduqdan sonra ölkədə vəziyyət heç də ürəkaçan deyildi. 1993-cü ilin iyununda ölkədə yaranmış mürəkkəb ictimai-siyasi durum Azərbaycanda real vətəndaş müharibəsi təhlükəsi yaratmışdı. Məhz Ulu öndərin apardığı uzaqgörən siyasət nəticəsində vətəndaş müharibəsinin qarşısı alındı, ölkədə baş alıb gedən xaos aradan qaldırılmaqla yanaşı, sosial-iqtisadi layihələrin icrasına başlanıldı. Heydər Əliyevin rəhbərliyi ilə Azərbaycan bütün sınaqlardan alnıaçıq, üzüağ çıxdı. Ölkəmizin hər yerində olduğu kimi Qax rayonunda da uğurlu islahatlara təkan verildi. “Regionların sosial-iqtisadi inkişafına dair” Dövlət proqramına uyğun olaraq Qaxda yeni iş yerləri açılıb, sahibkarlığın inkişafına geniş imkanlar yaradılıb, əhalinin enerji, qaz, içməli suya olan tələbatının səviyyəsi yüksəldilib, təhsil, səhiyyə xidmətləri yaxşılaşdırılıb, turizm inkişaf etdirilib, kənd təsərrüfatı məhsulları emal sənayesinin inkişafı istiqamətində məqsədyönlü işlər görülüb.
15-iyun Milli Qurtuluş Günü Zaqatala rayonunda da qeyd olunub. APA-nın yerli bürosunun məlumatına görə, yüzlərlə rayon sakini və ictimaiyyətin nümayəndəsi Heydər Əliyevin abidəsini ziyarət edib. Heydər Əliyev mərkəzində “Milli Qurtuluşumuzun zəfər yürüşü” adlı elmi-praktik konfrans keçirilib. Bayram tədbirləri çərçivəsində rayon ictimaiyyəti 18-ci əsr memarlıq abidəsi sayılan Qala düzü pilləkənlərinin əsaslı təmirdən sonrakı vəziyyətlə tanış olub. Milli Qurtuluş günü ərəfəsində Zaqatalanın ən ucqar dağ kəndi Meşləşə salınan körpü ilə tanışlıq da ictimaiyyətin sevincinə səbəb olub. Dövlət Su Təsərrüfatı və Meliorasiya Komitəsinin layihəsi əsasında Tala çayı üzərində ilyarama inşa edilən körpünün uzunluğu 185, eni isə 7 metrdir. Daha bir bayram tədbiri zaqatalalı gənclərin təşəbbüsü ilə həyata keçib. Belə ki, rayon gəncləri “Şəhərimizin tarixi hissəsini tanıyaq” devizi altında Zaqatala şəhərinin tarixi-memarlıq abidələrinin marşrutu üzərində yürüş keçirib.