Daxili siyasət

Daxili siyasət

Azərbaycan İslam Partiyası qurultaya hazırlaşır

20 iyun 2011 14:19 (UTC +04:00)

Bakı. Ramil Məmmədli - APA. Azərbaycan İslam Partiyasının (AİP) qurultayı keçiriləcək.

Partiya sədrinin müavini Hacı Akif Heydərli APA-ya deyib ki, AİP-in 7-ci qurultayının keçirilməsi ilə bağlı hazırlıq işlərinə başlanılıb. A. Heydərli bildirib ki, qurultayın vaxtı və yeri məhkəmənin hökmündən sonra müəyyənləşəcək: “Qurultayın keçirilməsi partiya rəhbərlərinin həbsi ilə bağlı deyil. Lakin məlum səbəblərdən - partiyanın rəhbərlərinin saxlanması ilə əlaqədar qurultayın vaxtını müəyyənləşdirə bilmirik. Qurultaydan sonra sənədlər hazırlanacaq və dövlət qeydiyyatına alınması üçün Ədliyyə Nazirliyinə təqdim olunacaq”. AİP sədrinin müavini qeyd edib ki, partiyanın təşkilatlanması ilə bağlı zəruri addımlar atılmaqdadır və artıq bir neçə rayonda qurumun yerli təşkilatları təsis edilib.

Qeyd edək ki, qeydiyyatsız fəaliyyət göstərən Azərbaycan İslam Partiyasının sədri Mövsüm Səmədov, partiyanın sədr müavini Vaqif Abdullayev, Astara rayon təşkilatının sədri Rufulla Axundzadə və Mövsüm Səmədovun qaynı Firdovsi Məmmədrzayev Cinayət Məcəlləsinin 28, 214.2.1-ci (qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən terrora hazırlıq), 28, 214.2.3-cü (odlu silahdan və silah qismində istifadə olunan predmetlərdən istifadə etməklə terrora hazırlıq), 228.3-cü (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə), 278-ci (hakimiyyəti zorla ələ keçirmə və ya onu zorla saxlama) maddələr üzrə ittiham olunublar.