Daxili siyasət

Ana səhifə

Daxili siyasət

İlham Əliyev: “Ölkəmizdə ilk növbədə insanların sosial məsələlərinin həlli üçün işlər görülür”

04 iyul 2011 22:35 (UTC +04:00)

APA-nın AzərTac agentliyinə istinadən verdiyi xəbərə görə, XDMX-nin rəisi, general-polkovnik Vaqif Axundov dövlət başçısına və xanımı Mehriban Əliyevaya məlumat verib ki, mərkəzin tikilib istifadəyə verilməsi həm XDMX-nin, həm də Milli Qvardiyanın əməkdaşlarının sosial problemlərinin həlli istiqamətində atılan mühüm addımdır. Dövlət başçısının tapşırığına əsasən, Mərkəzin yaradılması üçün XDMX-yə Yasamal rayonunun ərazisində 0,6 hektar torpaq sahəsi və müvafiq maliyyə vəsaiti ayrılıb. XDMX-nin əməkdaşlarının sağlamlığının qorunması, onların tibbi xidmətə olan ehtiyaclarının ödənilməsi məqsədi ilə inşa edilən bu mərkəzdə əsasən Almaniya və digər Avropa ölkələrinin istehsalı olan ən müasir avadanlıq quraşdırılıb.
Qeyd edilib ki, tikintisinə 2009-cu ilin mayında başlanılan səkkizmərtəbəli mərkəzin həyətyanı sahəsi abadlaşdırılıb, müasir işıqlandırma sistemi quraşdırılıb. Yüksək səviyyədə aparılan tikinti işləri bu ilin iyununda başa çatdırılıb. Mərkəzdə dünyada yeni tikilən tibb ocaqlarında istifadə edilən xüsusi havalandırma sistemi tətbiq olunub.
Bildirilib ki, bu müasir tibb ocağında ulu öndər Heydər Əliyevin xatirəsi ədəbiləşdirilib, “Həkimlik peşəsi öz xalqına, sənətinə yüksək sədaqət tələb edən bir işdir”, - deyən ümummilli liderin həyat və fəaliyyətinə həsr olunan fotoguşə yaradılıb.
Dövlət başçısı və xanımı əvvəlcə mərkəzin funksional diaqnostika şöbəsi ilə tanış olublar. Məlumat verilib ki, burada USM, kardioqram, exokardioqram, strestest, travmatologiya otaqları və iki müşahidə palatası fəaliyyət göstərir. Şöbədə quraşdırılan tibbi avadanlıq Avropa ölkələrinin istehsalıdır və ən müasir standartlara cavab verir.
Prezident İlham Əliyev və xanımı Mehriban Əliyeva təcili yardım şöbəsinin fəaliyyəti ilə tanış olublar. Şöbədə xəstələrə yüksək səviyyədə ilkin tibbi yardım göstərilməsi üçün hər cür şərait yaradılıb.
Mərkəzdə 70 nəfərlik konfrans zalı, kompyuterlə təchiz olunmuş iclas zalı, arxiv, dəftərxana və digər xidməti otaqlar da var.
Mərkəzin əməliyyat bloku ilə tanış olan Prezident İlham Əliyevin və xanımı Mehriban Əliyevanın diqqətinə çatdırıldı ki, burada üç əməliyyat otağı yaradılıb. Bu blokda daxili orqan, stomatoloji, qulaq-burun-boğaz əməliyyatları aparmaq mümkündür. Buradakı reanimasiya zalı da lazımı avadanlıqla təchiz olunub. Xüsusilə ağır xəstələr üçün ayrıca reanimasiya otağının da yaradıldığı əməliyyat blokundakı avadanlıq müasirliyi və yüksək keyfiyyəti ilə diqqəti cəlb edir.
Ümumi stasionar şöbədə isə 8 adi, 2 VİP palata xidmət göstərir. Hər bir palata telefon rabitəsi ilə təmin olunub.
Dövlət başçısına və xanımına məlumat verilib ki, mərkəzdə pnevmatik ötürücü sistem quraşdırılıb. Bu sistemin köməyi ilə həm xəstələrə qulluq göstərilir, həm də onların laborator analizlərinin 10-15 saniyə ərzində göndərilməsi təmin olunur.
Mərkəzin ikinci və üçüncü mərtəbələrində isə poliklinika şöbələri yerləşir. Kolonoskopiya və qastroduodenoskopiya otaqlarında xüsusi avadanlıq quraşdırılıb. Bu mərtəbədə, həmçinin ginekoloji və stomatoloji müayinələr aparmaq da mümkündür. Müalicəvi bədən tərbiyəsi zalında oftalmoloq, nevropatoloq, fizioterapevt otaqları və fizioterapiya zalı da fəaliyyət göstərir.
Prezident İlham Əliyev və xanımı Mehriban Əliyeva funksional diaqnostika şəbəkəsindəki rentgen otağında oldular. Buradakı rəqəmsal rentgen cihazı ən son texnologiya əsasında hazırlanıb. Kompyuter tomoqrafiyası 4D rejimində işləyir və bu avadanlıqla kardioloji, uroloji, damar müayinələrini aparmaq mümkündür.
Dövlətimizin başçısı və xanımı laboratoriyada yaradılmış şəraitlə də tanış oldular.
Müalicə-Diaqnostika Mərkəzinin 40 nəfərlik yeməkxanası da vardır.
Bir sözlə, mərkəzin bütün xidmət sahələrində ən müasir standartlara cavab verən şərait yaradılıb.
Azərbaycan prezidenti İlham Əliyev xidmətin şəxsi heyətini və mərkəzin kollektivini təbrik edərək deyib:
- Sizi gözəl Müalicə-Diaqnostika Mərkəzinin açılışı münasibətilə ürəkdən təbrik edir, sizə uğurlar arzulayıram.
İki il bundan əvvəl Xüsusi Dövlət Mühafizə Xidmətinin rəisi müraciət etmişdi ki, yeni diaqnostika-müalicə mərkəzi tikilsin. Mən bu təşəbbüsü dəstəklədim və qısa müddət ərzində gözəl bir mərkəz tikildi. Əvvəlki dövrdə əməkdaşlara lazımi səviyyədə tibbi xidmət göstərilmirdi. Çünki şərait yox idi. İndi isə burada yaradılan şərait hesab edirəm ki, ən yüksək səviyyədədir, həm bina çox gözəldir, rahatdır, genişdir. Daxili dizayn da çox gözəldir. Eyni zamanda, burada ən gözəl, müasir avadanlıq quraşdırılıb. Bu avadanlıqlar imkan verir ki, istənilən xəstəliyin vaxtında müayinəsi və müalicəsi mümkün olsun. Burada müasir əməliyyat blokları vardır. Yəni, ən müasir, dünya səviyyəsinə cavab verən xəstəxananın bütün əlamətləri burada var.
Mən çox şadam ki, qısa müddət ərzində gözəl mərkəz tikilib və Xüsusi Dövlət Mühafizə Xidmətinin əməkdaşlarına burada çox yüksək səviyyəli tibbi xidmət göstərilməlidir. Mən buna əminəm. Əlbəttə, burada quraşdırılan ən müasir avadanlıqda işləmək, bu avadanlığın fəaliyyətini, işini düzgün qurmaq üçün təcrübə lazımdır. Hesab edirəm ki, bu məsələ də öz həllini tapacaq. Beləliklə, sizin üçün gözəl tibbi mərkəz yaradılıb.
Xüsusi Dövlət Mühafizə Xidmətinin çox vacib funksiyaları var. Dövlət obyektlərinin qorunması, dövlət və hökumət qurumlarında işləyən insanların təhlükəsizliyinin təmin edilməsi, digər funksiyaları var. Elə etməliyik ki, Xidmətdə çalışan bütün əməkdaşların sosial problemləri layiqincə həllini tapsın.
Bu tibbi mərkəzin açılışı bu istiqamətdə atılmış gözəl addımdır. Əməkdaşların sosial-məişət problemləri də həll olunur. İstirahət üçün geniş şərait yaradılıb. Yəni, indi sizin xidmətiniz də ölkəmizin ümumi inkişafına uyğun şəkildə inkişaf edir, ən müasir avadanlıqla təchiz edilir. Bu tibbi mərkəzin açılışı bir daha onu göstərir ki, əməkdaşların normal yaşaması üçün Azərbaycan dövləti köməyini əsirgəmir.
Bütövlükdə, ölkəmizdə səhiyyə sisteminin təkmilləşməsi işində son illər ərzində çox vacib addımlar atılıb. Ölkəmizin demək olar ki, bütün bölgələrində yeni, gözəl, müasir tibbi mərkəzlər yaradılıb. Rayon xəstəxanaları əsaslı təmir edilib. Hər bir bölgədə müasir müalicə-diaqnostika mərkəzləri tikilib. Əlbəttə, Bakı şəhərində son bir neçə il ərzində ixtisaslaşdırılmış tibbi mərkəzlər yaradılıb və bu, imkan verir ki, Azərbaycan vətəndaşlarına səviyyəli və keyfiyyətli tibbi xidmət göstərilsin.
Bu gün biz həm bu gözəl müalicə-diaqnostika mərkəzinin açılışını qeyd edirik, eyni zamanda, Bakıda yeni, böyük sağlamlıq mərkəzinin təməl daşını da qoyacağıq. Bu mərkəz də çoxfunksiyalı böyük mərkəz olacaq. Bu mərkəzdə müxtəlif ixtisaslar üzrə bölmələr fəaliyyət göstərəcəkdir. Hesab edirəm ki, Bakı Sağlamlıq Mərkəzinin tikilib istifadəyə verilməsindən sonra şəhərimizin əsas səhiyyə istiqamətləri artıq lazımi səviyyəyə qalxacaq.
Səhiyyə sisteminə göstərilən diqqət hər bir ölkənin niyyətini göstərir. Ölkəmizdə ilk növbədə insanların sosial məsələlərinin həlli üçün işlər görülür. Son illər ərzində bu məsələlər üçün böyük vəsait də ayrılıb. Növbəti illərdə bu siyasət davam etdiriləcək. Elə etməliyik ki, Azərbaycan vətəndaşları yaşadıqları bölgələrdən asılı olmayaraq, istənilən yerdə keyfiyyətli tibbi xidmətlə təmin olunsunlar.
Mən sizi bu gözəl mərkəzin açılışı münasibətilə ürəkdən təbrik etmək istəyirəm. Bir daha demək istəyirəm və çox şadam ki, bu mərkəz qısa müddət ərzində, böyük zövqlə tikilib. Burada quraşdırılan və mənə göstərilən avadanlıq inkişaf etmiş ölkələrin ən qabaqcıl xəstəxanalarında da tətbiq olunur. Bu, belə də olmalıdır. Azərbaycanda tətbiq olunan bütün qabaqcıl təcrübə ən yüksək səviyyədə olmalıdır.
Burada müalicə olunacaq xəstələrin sağlamlığı Mərkəzdə çalışan tibb işçilərindən asılıdır. Əminəm ki, siz çox gözəl tibbi xidmət göstərəcəksiniz və hər halda burada yaradılmış şərait bunu deməyə əsas verir. Bir daha sizi ürəkdən təbrik edirəm və sizə uğurlar arzulayıram.