Daxili siyasət

Ana səhifə

Daxili siyasət

Bakıda ortaq türk dilinin yaradılması məsələsi müzakirə olunub

07 iyul 2011 09:47 (UTC +04:00)

Bakı. Ramil Məmmədli – APA. Bakıda Qazaxıstanda yerləşən Türk Xalqları Ümumdünya Assambleyasının təşəbbüsü ilə tədbir keçirilib. APA-nın məlumatına görə, toplantıda türk dünyasının mədəni, iqtisadi, siyasi əlaqələrinin inkişaf etdirilməsi və birliyinə nail olunması üçün qarşıda duran məsələlər barədə fikir mübadiləsi aparılıb.

Assambleyanın prezidenti, akademik Ermentay Sultanmurat deyib ki, türkdilli xalqlar Avrasiyanın ucsuz-bucaqsız torpaqlarında, Sakit okean sahillərindən Balkanlara qədər olan ərazilərdə məskunlaşıblar: “Türkdilli xalqlar hələ qədimdən nadir mədəniyyət yaradıb, ilk dünya sivilizasiyasının meydana gəlməsinin önündə gedib”. E. Sultanmurat inkişaf etməkdə olan türk dövlətlərinin əməli birliyinə nail olunması üçün imkanların olduğunu da diqqətə çatdırıb. Onun sözlərinə görə, türk dövlətlərinin və xalqlarının iştirakı ilə vahid iqtisadi məkanın yaradılması üzərində ciddi addımlar atılmalıdır: “Utancverici məsələlərdən ən önəmlisi isə türklərin bir-biri ilə xarici dildən istifadə edərək təmas qurmalarıdır. Ortaq türk dili məsələsi qısa zamanda həll olunmalıdır”.

Böyük Britaniyanın Edinburq Universitetinin professoru Qulamrza Səbri Təbrizi, assambleyanın birinci vitse-prezidenti Yəhya Yusif Canyar və başqaları çıxışlarında türk sivilizasiyasının, mədəniyyətinin bu gün ümumbəşəri mədəniyyətin ayrılmaz tərkib hissəsi olduğunu vurğulayıblar.

Toplantıda türk dövlətlərinin başçılarına müraciət də ünvanlanıb. Müraciətdə türk xalqlarının əməli birliyinə nail olunması məqsədilə ortaq dil və qrammatika məsələsinin həlli, o cümlədən hər il may ayının 4-cü şənbə gününün “Türk dili və mədəniyyəti günü” kimi qeyd edilməsi təklif olunub.