Daxili siyasət

Daxili siyasət

Azərbaycan prezidenti Sumqayıta səfər edib

07 iyul 2011 13:11 (UTC +04:00)

Sumqayıt Şəhər İcra Hakimiyyətinin başçısı Eldar Əzizov prezidentə görüləcək işlər barədə məlumat verib.

Dövlət başçısı yenidənqurma və abadlıq işlərinin yüksək səviyyədə həyata keçirilməsi üçün müvafiq tapşırıq və tövsiyələrini verib. Sonra Azərbaycan prezidenti Heydər Əliyevin Sumqayıt şəhərinin mərkəzindəki abidəsini ziyarət edərək, önünə gül dəstəsi qoyub. Daha sonra dövlət başçısı Nəsimi adına Sumqayıt dənizkənarı mədəniyyət və istirahət parkında görülən əsaslı yenidənqurma və abadlıq işlərinin gedişi ilə tanış olub. Prezident ictimaiyyət nümayəndələri ilə görüşüb.

Dövlət başçısı Sumqayıt şəhər 1 saylı Uşaq-Gənclər İdman Məktəbinin əsaslı təmir və yenidənqurmadan sonra açılışında iştirak edib. Prezident rəmzi açılışını bildirən lenti kəsib. Dövlət başçısı idmançılarla görüşdü, onlarla söhbət edib. Daha sonra prezident məktəblə tanış olub, məktəbin boks trenajor, voleybol, basketbol, fitnes, tennis, boks zallarına və hovuza baxıb, idmançıların nümunəvi çıxışlarını izləyib.

Sonra dövlət başçısı Sumqayıt şəhərinin mərkəzində Heydər Əliyev parkında aparılan abadlıq və quruculuq işləri ilə tanış olub. Prezident parkda tikiləcək Heydər Əliyev Muzeyinin fotoeskizlərinə baxıb. Dövlət başçısına parkın ərazisində görüləcək işlərlə bağlı məlumat verilib.

Azərbaycan dövlətinin başçısı Kimyaçı Mədəniyyət Sarayında aparılan əsaslı təmir və yenidənqurma işləri ilə də tanış olub. Prezident sarayın həyətində Heydər Əliyev meydanının yenidən qurulmasını əks etdirən stendlərə baxıb.

Dövlət başçısı Sumqayıt şəhərindəki Cümə məscidində aparılan əsaslı təmir və yenidənqurma işləri ilə də tanış olub. Məscidin axundu prezidentə görüləcək işlər barədə məlumat verib. Bildirilib ki, məsciddə yeni minarə də tikiləcək. Cümə məscidinin axundu dövlət başçısına müqəddəs Qurani-Kərim hədiyyə edib.

Sonra Prezident İlham Əliyev Sumqayıt Texnologiyalar Parkında yüksəkgərginlikli elektrik avadanlığı zavodunun fəaliyyəti ilə tanış olub. “Azərenerji” ASC prezidenti Etibar Pirverdiyev dövlət başçısına zavod haqqında məlumat verib. Bildirilib ki, müəssisədə dünyanın ən qabaqcıl texnologiyaları ilə hazırlanmış avadanlıq, eləcə də Finlandiya, Almaniya və Türkiyə istehsalı olan əymə, lazer kəsmə dəzgahları və ABŞ-dan alınmış laboratoriya sınaq qurğuları quraşdırılıb. Prezident İ. Əliyev müəssisənin günəş kollektorları və istilik qazanları istehsalı sexini gəzib.

Daha sonra dövlət başçısı Sumqayıt Texnologiyalar Parkında qaynar sinkləmə zavodunun fəaliyyəti ilə tanış olub. Dövlət başçısına məlumat verilib ki, uzunluğu 15 metrə qədər olan polad məmulatın sinklənməsinə tam şəraitin olduğu zavodda tətbiq edilən texnologiya yüksək səmərəli və ekoloji təmiz istehsal prosesini təmin edir. Qeyd edilib ki, zavodun ən son və müasir texnologiyalarla təchiz olunması buraxılan məhsulların keyfiyyətinə və uzunömürlülüyünə tam zəmanət verir.

Bununla da, Azərbaycan prezidentinin Sumqayıta səfəri başa çatıb.

Əliyev_Sumqayıt