Daxili siyasət

Ana səhifə

Daxili siyasət

Müsavat və AXCP “Zirvə görüşü”nə qatılmamalarının səbəblərini açıqlayıb

11 iyul 2011 10:35 (UTC +04:00)

Bakı. Ramil Məmmədli - APA. “İctimai Palatadan kənarda müxalifətin birliyinin yaradılması cəhdləri qeyri-ciddi qarşılanmalıdır. İyulun 9-da 6 partiyanın iştirakı ilə keçirilən tədbirdə hər hansı qurumun yaradılmasına yönələn fəaliyyət müxalifəti gücləndirməyəcək, əksinə zəiflədəcək”.

Bunu APA-ya açıqlamasında Müsavat Partiyası başqanının müavini Tofiq Yaqublu deyib. O, Müsavat Partiyasının iyulun 9-da 6 siyasi təşkilat rəhbərinin iştirakı ilə keçirilən müzakirələrə qatılmamasına da aydınlıq gətirib: “Əvvəlcədən məlum olduğu kimi həmin gün İctimai Palata çərçivəsində tədbir keçirirdik. Birincisi, tədbirlər üst-üstə düşüb. Digər tərəfdən isə artıq müxalifətin bir araya gəldiyi qurum fəaliyyət göstərir. Bu, İctimai Palatadır. Müxalifətin birliyi istiqamətində ciddi addımların atıldığı, iqtidarla mübarizənin kəskinləşdiyi vaxtda belə bir addımın atılmasına nə ehtiyac var?” T. Yaqublu qeyd edib ki, həmin 6 partiyanın birgə fəaliyyəti iqtidarla mübarizəyə yönələcəksə, onda onlara uğurlar arzulamaq olar: “Müxalifətin digər qanadını ittiham etməyə başlayacaqlarsa, məlum olacaq ki, niyyətləri müxalifətin birliyinə yox, parçalanmasına yönəlib”.

AXCP-nin siyasi məsələlər üzrə müavin Fuad Qəhrəmanlı isə deyib ki, İctimai Palatada açıq qapı siyasəti həyata keçirilir. Bu baxımdan mövcud olan əməkdaşlıq mexanizmi var: “Əhəmiyyətlisi isə ondadır ki, İctimai Palata ictimai təşkilatları və müstəqil şəxsləri əhatə edir. Bu, indiyə qədər olanlardan fərqli birlik modelidir. Yeni bir formatın yaradılmasına da ehtiyac görmürük”. F. Qəhrəmanlı AXCP-nin həmin tədbirdə iştirakının məqsədəuyğun hesab olunmadığını da qeyd edib: “Həmin toplantıda iştirak edən partiyalara və şəxslərə də İctimai Palatanın qapıları açıqdır. Mövcud olan mexanizmi kənara atmaqla birliyə nail olmaq mümkün deyil”.

Klassik Xalq Cəbhəsi Partiyasının (KXCP) sədri Mirmahmud Mirəlioğlu bildirib ki, müxalifətdə təmsil olunan 6 partiya rəhbərinin iştirakı ilə keçirilən “Zirvə toplantısı” bu düşərgədə birliyə nail olmaq üçün atılan mühüm addımlardan biridir. Onun sözlərinə görə, birgə fəaliyyət 6 partiyanın gələcəkdə bu istiqamətdə müzakirələri davam etdirməsi niyyətindən asılı olacaq: “Digər tərəfin qiymətləndirilməsi haqda isə məlumatlı deyiləm. 6 partiyanın birgə əməkdaşlıq istəyi kiməsə qarşı deyil. Niyyət protokolu da AXCP və Müsavat Partiyası iştirak etmədiyinə görə imzalanmadı. Bununla bir-birimizə şans yaradıldı”.

M. Mirəlioğlu deyib ki, müxalifət liderlərinin geniş tərkibli növbəti görüşündə iştirak etmək üçün tərəflər fərqli mövqe nümayiş etdirə biləcək: “Azərbaycanda heç kim deyə bilməz ki, müxalifəti təmsil edir. Onların İctimai Palata haqda şişirdilmiş formada dedikləri fikirlər məsələyə doğru yanaşma deyil”.

Qeyd edək ki, iyulun 9-da keçirilən “Zirvə görüşü”nə AMİP, VİP, ADP, ALP, KXCP və Ümid partiyaları qatılıb.

“zirvə_görüş”