Daxili siyasət

Ana səhifə

Daxili siyasət

Avro-Atlantik Şuranın Təşkilat Komitəsinin ilk iclası keçirilib

11 iyul 2011 11:03 (UTC +04:00)

Bakı. Pərvin Abbasov – APA. Azərbaycanda Avro-Atlantik Şura adlı yeni qurumun Təşkilat Komitəsinin ilk iclası keçirilib. APA-nın xəbərinə görə, iclasdan sonra keçirilən mətbuat konfransında yeni təşkilatın məqsəd və vəzifələri barədə məlumat verilib. Mətbuat konfransında bildirilib ki, Sülhəddin Əkbər (Müsavat Məclisinin sabiq sədri, Azərbaycan-Atlantika Əməkdaşlıq Assosiasiyasının prezidenti) yeni qurumun Təşkilat Komitəsinin sədri, Yaşar Cəfərli (ATMİA) TK sədrinin müavini, Anar Əhmədov TK-nın katibi, Cəsur Sümərinli isə TK-nın ictimaiyyətlə əlaqələr üzrə məsul şəxsi seçiliblər.

TK üzvləri arasında bu şəxslərlə yanaşı, Müsavat Partiyasının sabiq funksioneri İbrahim İbrahimli, “Atlas” Araşdırmalar Mərkəzinin rəhbəri Elxan Şahinoğlu, politoloq Leyla Əliyeva, Müsavat Divanının üzvü, politoloq Hikmət Hacızadə, ekspertlər İldırım Məmmədov və Azad İsazadə, Regional Sabitlik və Təhlükəsizlik Mərkəzinin rəhbəri Elçin Eldəniz, jurnalist Samir Güləliyev, Müsavat Partiyasının Mərkəzi Nəzarət Təftiş Komissiyasının üzvü Əlövsət Talışxanlı və başqaları da var.

S. Əkbər bildirib ki, TK-nın bugünkü ilk iclasına qədər üç qapalı toplantı keçirilib: “Bugünkü iclasda Təşkilat Komitəsinə yeni qurumun təsis konfransını keçirmək üçün üç ay vaxt verildi”. Onun sözlərinə görə, Avro-Atlantik Şurada 27 təşkilat cəmləşib. Bununla yanaşı, yeni qurumda müstəqil politoloqlar, partiya funksionerləri və jurnalistlər də var: “Təşkilat Komitəsinə üzvlük prosesi davam edir. Bura istənilən partiyanın nümayəndəsi üzv ola bilər”.

S. Əkbər Avro-Atlantik Şurasının siyasi fəaliyyətlə məşğul olmayacağını, ictimai birlik kimi fəaliyyət göstərəcəyini bildirib. Təşkilatın məqsədi ölkənin demokratikləşməsi və avroatlantik məkana inteqrasiyası proseslərinə ictimai dəstəyi təşkil etməkdir.

S. Əkbər əvvəlcə ölkənin mərkəzi şəhərlərində, gələcəkdə isə bölgələrdə tədbirlər keçirməyi planlaşdırdıqlarını bildirib: “Bölgələrdə regional mərkəzlər yaratmağı da düşünürük”.