Daxili siyasət

Ana səhifə

Daxili siyasət

Azərbaycan prezidenti Xızıda Müalicə-Diaqnostika Mərkəzi və YAP rayon təşkilatının inzibati binasının açılışında iştirak edib

19 iyul 2011 13:32 (UTC +04:00)

APA-nın məlumatına görə, ARDNŞ prezidenti Rövnəq Abdullayev dövlət başçısına məlumat verib ki, şirkət tərəfindən inşa olunan bu müasir səhiyyə ocağı dördmərtəbəli əsas korpusdan və yardımçı binalardan ibarətdir.

Prezident İ. Əliyev rəmzi açılışı bildirən lenti kəsdikdən sonra mərkəzlə tanış olub.

Prezidentə məlumat verilib ki, burada əsas korpusda regional və yerli konfransların, müxtəlif tədbirlərin keçirilməsi üçün 155 nəfərlik akt zalı inşa olunub . Mərkəzdə qəbul və hemodializ, əməliyyat bloku, stasionar və reanimasiya şöbələri, konsultativ diaqnostika poliklinikası var. Hemodializ şöbəsində beş hemodializ aparatı quraşdırılıb. Şüa-diaqnostika şöbəsi kompyuter tomoqraf və rentgen aparatları ilə təchiz olunub.

Konsultativ diaqnostika poliklinikasında bütün növ xəstəliklərin müayinəsi və müalicəsi üçün kabinetlər yaradılıb. Endoskopik kabinet fibroqastroskop və kolonoskopla təchiz olunub.

Mərkəzin laboratoriyasında biokimyəvi, mikrobioloji, hematoloji və immunoloji-seroloji analizlərin aparılması mümkündür. Stasionar şöbədə hər biri iki çarpayılıq 10 palata var. Əməliyyat blokunda xaricdə istehsal olunan yüksək keyfiyyətli tibbi avadanlıq quraşdırılıb.

Mərkəzdə 205 nəfər daimi işlə təmin ediləcək.

Müalicə-Diaqnostika Mərkəzi ilə tanışlıqdan sonra dövlət başçısı səhiyyə ocağının kollektivi və rayon ictimaiyyətinin nümayəndələri ilə görüşüb.

Dövlət başçısı Yeni Azərbaycan Partiyası (YAP) Xızı rayon təşkilatının yeni inşa olunmuş inzibati binasının açılışında da iştirak edib. Prezident binanın rəmzi açılışını bildirən lenti kəsib.

Prezident İlham Əliyev görülmüş işlərdən razılığını bildirib, tövsiyə və tapşırıqlarını verib.

Əliyev_Xızı