Daxili siyasət

Ana səhifə

Daxili siyasət

Araz Əlizadə: “Ayaz Mütəllibovun təhlükəsizliyinə dövlət səviyyəsində təminat verilib”

09 avqust 2011 08:51 (UTC +04:00)

Bakı. Ramil Məmmədli-APA. “Oğlunun yas mərasimində iştirak etmək üçün Azərbaycana qayıdan Ayaz Mütəllibovun toxunulmazlığı dövlət səviyyəsində təmin olunub”. APA-nın məlumatına görə, bu barədə jurnalistlərə açıqlamasında Azərbaycan Sosial Demokrat Partiyasının (ASDP) həmsədri Araz Əlizadə bildirib.

ASDP həmsədri Ayaz Mütəllibovun Azərbaycana qayıtması üçün dövlət başçısı İlham Əliyevə müraciət edildiyini bildirib: “Prezident böyük humanistlik göstərib bu icazəni verdi. Azad Mütəllibov uzun müddət idi ki, xəstə idi. Bu icazə oğlunun vəziyyəti kritik həddə çatmazdan əvvəl verilmişdi. Sadəcə, Ayaz Mütəllibovun Azərbaycana qayıtması üçün fürsət olmamışdı”.

A. Əlizadə Heydər Əliyev Fondunun Azad Mütəllibovun müalicə olunması üçün vəsait ayırdığını da açıqlayıb: “Mən atılan humanist addımlara görə, Heydər Əliyev Fondunun prezidenti, millət vəkili Mehriban Əliyevaya, prezident İlham Əliyevə Ayaz Mütəllibovun, ailəsinin, özümün, partiyamızın adından təşəkkür edirəm. Həmçinin biz Azərbaycanın Rusiyadakı səfirliyinə təşəkkür edirik. Səfirlik yaxşı işlədi və lazım olan sənədləşmə işlərini həll etdilər. Ayaz Mütəllibov Azərbaycan prezidentinin humanistliyi nəticəsində Bakıya gəldi və oğlunu son mənzilə yola salmaq fürsəti əldə etdi. Mən arzu edirəm ki, bu humanist addımlar bundan sonra da davam etsin. Biz bir xalqın övladlarıyıq”.

ASDP həmsədri eks-prezident Ayaz Mütəllibovun üzərində olan cinayət işi barədə verilən suala cavabında bunları deyib: “Milli Məclisin payız sessiyasında eks-prezidentlərin statusu ilə bağlı qanun qəbul ediləcək və bu məsələ də öz həllini tapacaq. Hazırda isə Ayaz Mütəllibovun toxunulmazlığı dövlət səviyyəsində təmin olunub. Təmin olunmasaydı, o, hava limanında həbs olunardı”.

A. Əlizadə A. Mütəllibovun Azərbaycanda neçə gün qalacağı barədə sualı isə cavablandırmayıb. Onun sözlərinə görə, eks-prezident Bakıda olduğu dövrdə mətbuata geniş açıqlama verməyəcək: “Övlad itkisi ata üçün böyük dərddir. Mən bu hissi keçirmişəm. Belə bir halda mətbuat nümayəndələrindən də xahiş edirəm ki, məsələyə insani prizmadan yanaşsınlar”.

Mütəllibov _ Bakı _ yas mərasimi