Daxili siyasət

Ana səhifə

Daxili siyasət

Azərbaycan prezidenti Şabran Rayon Mərkəzi Xəstəxanasının açılışında iştirak edib

15 avqust 2011 16:57 (UTC +04:00)

Şabran – APA. Avqustun 15-də Azərbaycan prezidenti İlham Əliyev respublikanın şimal bölgəsinə səfəri çərçivəsində Şabran Rayon Mərkəzi Xəstəxanasının açılışında iştirak edib.

APA-nın “AzərTAC”a istinadən yaydığı məlumata görə, tədbirdə dövlət başçısına bildirilib ki, üçmərtəbəli xəstəxananın tikintisinə 2008-ci ilin oktyabrında başlanılıb. Burada tikintinin ümumi sahəsi 5 117 kv. metrdir. Xəstəxananın inşaat işləri müasir texnologiyalar və qabaqcıl təcrübələr əsasında həyata keçirilib.

Ölkə prezidentinə məlumat verilib ki, 80 çarpayılıq xəstəxananın birinci mərtəbəsində doğum şöbəsi və poliklinika fəaliyyət göstərir. Burada rentgen, ultrasəslə müayinə, stomatoloq, otolarinqoloq, terapevt kabinetləri var. Bütün kabinetlər ən müasir avadanlıqla təchiz edilib. Xəstəxanada terapiya və uşaq xəstəlikləri, cərrahiyyə, anesteziologiya və intensiv terapiya şöbələri də var, bu şöbələrdə müasir texnologiyaların tələblərinə uyğun hazırlanan tibbi avadanlıq quraşdırılıb. Xəstəxananın müasir avadanlıqla təmin edilməsi, ilk növbədə, burada tibbi müayinələrin və müalicə işinin ən yüksək səviyyədə təşkilinə və aparılmasına hərtərəfli imkan yaradır.

Tədbirdə qeyd olunub ki, Şabran Rayon Mərkəzi Xəstəxanasında 60-dək həkim və 140-dək orta tibb işçisi çalışacaq. Xəstəxana ilə tanışlıqdan sonra dövlət başçısı ictimaiyyətin nümayəndələri və tibb işçiləri ilə görüşüb.