Daxili siyasət

Ana səhifə

Daxili siyasət

Prezident İlham Əliyev: “Bu gün Azərbaycan iqtisadi və sosial inkişaf templərinə görə dünya miqyasında ən qabaqcıl yerlərdədir”

16 avqust 2011 00:25 (UTC +04:00)

APA-nın AzərTac agentliyinə istinadən verdiyi xəbərə görə, bu barədə prezident İlham Əliyev Siyəzən rayonun ictimaiyyətinin nümayəndələri ilə görüş zamanı deyib.
Prezident bildirib ki, Azərbaycanda son illər ərzində geniş quruculuq işləri aparılır. Bütün bölgələrdə canlanma, inkişaf var, konkret layihələr icra edilir. “Mən istəyirəm ki, hər bir yerdə, hər bir rayonda işlər yüksək səviyyədə aparılsın. İlk növbədə insanları narahat edən problemlər tezliklə aradan qaldırılsın və bu istiqamətdə konkret addımlar atılıb. Bunu Siyəzən rayonunun timsalında da görə bilərik, infrastruktur layihələri icra edilir, yollar salınır, magistral yol çəkilmişdir, Bakıya gediş-gəliş çox rahatdır. Eyni zamanda, kənd yollarının çəkilişi ilə bağlı əlavə konkret tədbirlər görülməlidir və görüləcək”, o deyib.
Dövlət başçısı qeyd edib ki, rayonun elektrik enerjisi təchizatı ilə bağlı heç bir problem yoxdur. Qazlaşdırma proqramı icra edilir. Siyəzəndə bütün dövrlərdə qaz təchizatı başqa rayonlara nisbətən daha da yaxşı olub. “Ancaq qarşıya vəzifə qoymuşuq ki, bütün kəndlərə qaz xətləri çəkilsin. İndi bu istiqamətdə işlər görülür. İçməli su, kanalizasiya layihələrinin icrası ilə bağlı işlər gedir və bu proqram da demək olar ki, bütün bölgələri əhatə edir. İllər boyu yığılıb qalmış problemlər Azərbaycanda birdəfəlik həll olunmalıdır. İndi hər bir yerdə içməli su, kanalizasiya layihələri icra edilir, ya da ki, hazırlıq işləri aparılır”, o bildirib.
Sosial infrastrukturun yeniləşməsi ilə bağlı Siyəzən rayonunda müəyyən işlər görülüb. Bir neçə məktəb tikilib, təmir olunub. Növbəti illərdə ehtiyac olan məktəblərdə də təmir-bərpa işləri aparılmalıdır. Prezidentdə olan məlumata görə, iş yerlərinin yaradılması ilə bağlı Siyəzən rayonunda o qədər də ciddi problem yoxdur. Burada ənənəvi neft sənayesində işləyənlər kifayət qədər olub. Vaxtilə burada ulu öndərin rəhbərliyi ilə broyler fabriki yaradılmışdır. İndi o da, iş yerlərinin yaradılması üçün çox vacib funksiyaları icra edir. Ancaq Azərbaycanda əhalinin sayı artır və nə qədər yeni iş yerləri yaradılsa da, yenə də iş yerlərinin açılmasına ehtiyac var. Ona görə, biznes mühitinin yaxşılaşdırılması, biznesmenləri təşviq etmək, kreditlərin verilməsi, bütün başqa məsələlərin həlli üçün konkret proqramlar var.
“Biz Siyəzən rayonunun turizm imkanlarından da daha geniş şəkildə istifadə etməliyik. Bu rayonun özünəməxsus zəngin turizm potensialı vardır. Böyük dəniz zolağı, eyni zamanda, gözəl hava, dağlar. Azərbaycanda indi, demək olar ki, turizm üçün yararlı, əlverişli olan yerlərdə böyük komplekslər tikilir, otellər, istirahət zonaları, parklar yaradılır. Biz bu istiqamətdə də, əlbəttə ki, özəl sektoru bu işlərə daha çox cəlb etməliyik. Ancaq hamınız yaxşı bilirsiniz ki, infrastruktur olmadan turizmin inkişafı mümkün deyildir. Ona görə, hər bir yerdə, hər bir rayonda, ilk növbədə infrastruktur layihələri icra edilməli, yollar tikilməli, necə deyərlər, müasir memarlıq təcrübəsi tətbiq olunmalıdır. İndi rayonun gələcək inkişafı ilə bağlı mənə göstərilən stendlərdə əksini tapan təkliflər hesab edirəm ki, təqdirəlayiqdir”, prezident bildirib.
O vurğuladı ki, bütün bu işləri rayon ictimaiyyəti, icra nümayəndələri, dövlət rəhbərliyi birlikdə etməlidir. “Biz ölkəmizi gücləndiririk, inkişaf etdiririk. Bu gün Azərbaycan iqtisadi və sosial inkişaf templərinə görə dünya miqyasında ən qabaqcıl yerlərdədir”, İlham Əliyev deyib
O qeyd edib ki, indi bəzi ölkələrdə iqtisadi-maliyyə böhranının ikinci dalğası başlayıb. Azərbaycanda biz bunun tam əksini görürük. “Bizim siyasətimizin təməlində Azərbaycan vətəndaşıdır. Bütün görülən işlər bir məqsədi güdür ki, Azərbaycan vətəndaşı daha da yaxşı yaşasın. Bu il həyata keçirilən pensiya islahatı nəticəsində 900 minə qədər pensiyaçının pensiyası orta hesabla 40 faiz artır”, o bildirib.
Prezidentin sözlərinə görə, inkişaf etmiş ölkələrdə sosial ödəmələr, sosial proqramlar kəsilir, azalır, ixtisar edilir, maaşlar kəsilir, dövlət qurumlarında işləyənlərin iş yerləri bağlanır. Azərbaycanda iş yerləri açılır, maaşlar, pensiyalar artırılır, sosial proqramlar icra edilir. Bir dənə də olsun sosial proqramda geriləmə, yaxud da ki, ixtisar olmayıb.
“Biz də böhrandan əziyyət çəkmişik. 2008-ci, 2009-cu, hətta 2010-cu illərdə neftin qiymətinin kəskin şəkildə aşağı düşməsi bizə də problemlər yaradıb. Ancaq biz bu vəziyyətdən çıxa bilmişik. Çünki biz artıq qeyri-neft sektorunun inkişafına nail olmuşuq. Əgər iqtisadi göstəricilərə nəzər salsaq görərik ki, bu ilin altı ayında qeyri-neft sektoru 6 faiz artıb. Yəni, bu rəqəmlər əlbəttə ki, statistika üçün göstəricidir. Ancaq bu rəqəmlərin arxasında gərgin iş, məqsədyönlü siyasət, strateji xəttimiz dayanır. Bütün bölgələrin inkişafı bizə imkan verir ki, ölkə hərtərəfli inkişaf etsin”.
Dövlət başçısı deyib ki, Siyəzən rayonu əhali baxımından böyük rayon deyil. Ancaq buna baxmayaraq, Siyəzən rayonuna da başqa, əhalisi çox olan rayonlara göstərilən qədər diqqət göstərilir. Bu gün görülən işlər bunun nümunəsidir. O qeyd etdib ki, indi bölgədə yeni xəstəxanaların tikintisi geniş vüsət alıb. O proqramın da təməli burada qoyulub, 2004-cü ildə bölgələrdə tikilən birinci xəstəxana Siyəzəndə olub və mən, yadımdadır, xəstəxananın açılışında iştirak etmişdim.
“Mən sizi ürəkdən salamlayıram və gələcək uğurlar arzulayıram. Rayon rəhbərliyinə yeni başçı təyin edilib. Ona bütün göstərişlər verilib ki, burada fəal işləsin, insanlarla daim təmasda olsun, insanların problemləri ilə yaşasın. Siyəzən rayonu qısa müddət ərzində Azərbaycanın ən qabaqcıl rayonlarından birinə çevrilməlidir. Siz də, əlbəttə ki, bütün bu işlərdə fəal iştirak etməlisiniz”, prezident deyib.