Daxili siyasət

Ana səhifə

Daxili siyasət

İctimai Palatanın təşəbbüsü ilə “Avtoritarizmdən demokratiyaya yumşaq keçidin Yol xəritəsi” adlı sənədin ictimai müzakirəsi keçirilib

17 avqust 2011 12:27 (UTC +04:00)

Bakı. Ramil Məmmədli - APA. Müsavat Partiyasının qərargahında İctimai Palatanın (İP) təşəbbüsü ilə hazırlanan “Avtoritarizmdən demokratiyaya yumşaq keçidin Yol xəritəsi” adlı sənədin ictimai müzakirəsi keçirilib. APA-nın məlumatına görə, İP Koordinasiya Şurasının üzvü Vidadi Mirkamal bildirib ki, sənəd təmsil etdiyi qurumun ölkədəki siyasi qüvvələr arasında barışdırıcı mühit yaratmaq niyyəti ilə hazırlanıb. O, digər partiyaları da bu sənədin hazırlanması prosesindən yaxından iştirak etməyə və təkliflərini verməyə çağırıb.

“Yol xəritəsi”nin müəllifi, İP üzvü Zəfər Quliyev deyib ki, sənəd 3 fəsildən, 12 maddədən ibarətdir. İP-in bəzən radikallıqda, qeyri-konstruktivlikdə ittiham olunduğunu deyən Z. Quliyev deyib ki, bu sənədin ictimaiyyətin müzakirəsinə çıxarılması İP-in demokratik islahatların, ölkədəki siyasi qüvvələrin inteqrasiyasının, korrupsiya ilə birgə mübarizənin tərəfdarı olduğunu sübut edir.
İP üzvü Pənah Hüseyn isə sənədin bu şəkildə hazırlanması ilə razılaşmadığını və İP-in sessiyasında müzakirəyə çıxarılan mətnlə ziddiyyət təşkil etdiyini vurğulayıb: “Nəyə görə müxalifət partiyalarına ümumi, Yeni Azərbaycan Partiyasının icraçı katibinə rəsmi dəvət göndərilir? Bu ayrı-seçkiliyi qəbul etmirəm. Bundan başqa, hakimiyyətlə dialoqa başlanmazdan əvvəl İctimai Palata cəmiyyətlə öz arasındakı dialoq prosesini sürətləndirməlidir. Digər tərəfdən, qurumun sessiyasında müzakirəyə çıxarılan mətnlə, burada təqdim olunan mətn arasında ziddiyyətlər var. Yəni bir sıra məqamlar çıxarılıb. Bu cür xəritə ilə məqsədə nail olmaq mümkün deyil. Daha doğrusu, sənədin bu şəkildə müzakirəsi reallığı əks etdirmir. Çünki sənəddə ideyalar aydın və dolğun deyil”.

P. Hüseyn sənədin İP səviyyəsində müzakirəsinin davam etdirilməsi təklifi ilə çıxış edib.

Onun iradları Vidadi Mirkamal və Zəfər Quliyev tərəfindən cavablandırılıb.
Daha sonra yığıncaqda dinşünas İlqar İbrahimoğlu, İP üzvü Xaliq Bahadır, İP Qadınlar Şurasının sədri Gözəl Bayramlı, Şərq-Qərb Araşdırmalar Mərkəzinin rəhbəri Ərəstun Oruclu, AXCP sədri Əli Kərimli, Müsavat Partiyasının başqanı İsa Qəmbər və digərləri çıxış ediblər.

İctimai Palata _ Yol Xəritəsi