Daxili siyasət

Ana səhifə

Daxili siyasət

Milli Məclisin payız sessiyasında sosial sahəyə dair bir neçə qanun layihəsi müzakirəyə çıxarılacaq

19 avqust 2011 13:34 (UTC +04:00)

Bu barədə APA-ya Milli Məclisin Sosial siyasət Komitəsinin sədr müavini Musa Quliyev məlumat verib.

Millət vəkilinin sözlərinə görə, yeni qanun layihələrinə “Sosial xidmət haqqında”, «Ailə planlaşdırılması və reproduktiv sağlamlıq haqqında», «Bioetika haqqında», «Tütün məmulatlarının istehlakının məhdudlaşdırılması haqqında» qanun layihələri daxildir. Bunlardan başqa, bir sıra mövcud qanunlara, o cümlədən Ailə Məcəlləsinə dəyişikliklərin edilməsi nəzərdə tutulur.

Ailə Məcəlləsinə nikaha girənlərin icbari tibbi müayinəsi ilə bağlı əlavə təklif olunur.

M. Quliyev bildirib ki, «Bioetika haqqında» qanun (digər adı «Pasiyentin hüquqları haqqında») həkim-xəstə və xəstə-tibb müəssisəsi arasındakı münasibətləri tənzimləyəcək: «Bu qanun layihəsinin payız sessiyası ərzində komitədə müzakirəsi nəzərdə tutulur. Düşünürəm ki, qanunun özünün qəbulu parlamenin 2012-ci il yaz sessiyasına mümkün ola bilər».

Deputat «Tütün məmulatlarının istehlakının məhdudlaşdırılması haqqında» qanun layihsinin müzakirələrə hazır olduğunu da deyib: «Mövcud prosedura görə dövlət başçısı bu layihəyə münasibət bildirəndən sonra parlamentdə müzakirəyə çıxarılmalıdır. Bu qanunun qəbulu zəruridir».

Qeyd edək ki, Milli Məclisin payız sessiyası sentyabr ayının 30-da başlayacaq.