Daxili siyasət

Ana səhifə

Daxili siyasət

AMİP rəhbərliyi arasında narazılıq yaranıb

02 sentyabr 2011 13:49 (UTC +04:00)

Bakı. Pərvin Abbasov-APA. Azərbaycan Milli İstiqlal Partiyasının (AMİP) mətbuat və təbliğat katibi Əli Orucov partiyanın fəaliyyətində qüsurlar olduğu qənaətindədir. Ə. Orucov APA-ya açıqlamasında deyib ki, son dövrlər AMİP-in qərarlarında qüsurlar və yürütdüyü siyasətində bir sistemsizlik və uyğunsuzluq var: “Bəzən görülən iş yarımçıq qalır, yaxud təşəbbüsə biganəlik göstərilir. Bu isə normal hal sayıla bilməz. AMİP ölkədə demokratik dəyərlərə söykənən, ən şəffaf fəaliyyət göstərən partiyalardan biri olub. Amma çox təəssüflər olsun ki, bu gün partiyamız cəmiyyətin bizdən gözlədiklərini təqdim edə bilmir. Hesab edirəm ki, ölkədə və dünyada gedən ciddi, sürətli proseslər fonunda AMİP fəaliyyətini gücləndirməli və çevik fəaliyyət göstərməlidir. Həmçinin, hesab edirəm ki, partiyanın seçkili qurumlarının, xüsusən də Mərkəzi Şuranın iclasının keçirilməsinə ehtiyac var”.

Ə. Orucov partiya rəhbərliyindəki şəxslərdən konkret kimləri tənqid etdiyini açıqlamasa da, deyib ki, AMİP-in verdiyi qərarlar partiyanın Nizamnaməsində göstərildiyi kimi kollegial olmalıdır: “Kollegiallıq qorunmalıdır və partiyadaxili geniş müzakirələr aparılmalıdır”.

AMİP Siyasi Şurasının üzvü, partiyanın sabiq baş katibi Fuad Muxtarov isə APA-ya açıqlamasında daha kəskin danışıb. O, partiyanın fəaliyyətinin sıfır səviyyəsində olduğunu vurğulayıb: “Görünən dağa nə bələdçi? İndi görünən odur ki, AMİP-in fəaliyyəti yoxdur. Adicə bir şeyi deyim, AMİP Siyasi Şurasının toplantısı axırıncı dəfə təxminən may ayında keçirilib. Əli Orucovun dedikləri ilə razılaşmamaq mümkün deyil”.

F. Muxtarov bu məsələlərlə əlaqədar rəhbərliyi günahlandırıb: “Partiyanın İctimai Palatadan gözlənilməz olaraq çıxması şübhəli idi. Bununla bağlı Siyasi Şura necə çağırıldı, Siyasi Şurada kvorum oldu-olmadı, bunlar araşdırılmalıdır. Partiyanın indiki sıfır fəaliyyətinə görə rəhbər və baş katib günahkardır. Siyasi Şuranın toplantısı sabaha, yəni sentyabrın 3-nə çağırılıb. Yəqin ki, rəhbərlikdən bu məsələlərlə bağlı hesabat tələb olunacaq”.

AMİP-in baş katibi Arzuxan Əlizadə APA-ya açıqlamasında özünün və AMİP-in ünvanına səsləndirilmiş ittihamlarla qətiyyən razılaşmadığını bildirib: “Hesab etmirəm ki, AMİP-də nə isə ciddi bir narahatçılıq var. Strukturlar fəaliyyət göstərir, öz yerindədir. Ola bilsin ki, Mərkəzi Şuranın toplanmasında gecikmə var, bu da obyektiv səbəblərlə bağlıdır. Üstəgəl, yay fəsli olduğundan partiya üzvləri, həmçinin rəhbərlikdə təmsil olunan şəxslər ölkədən kənarda olublar. Bununla belə partiya fəaliyyətini davam etdirir. Partiyanın beynəlxalq əlaqələri mövcuddur, partiya nümayəndələrinin xaricə səfərləri gözlənilir”.

A. Əlizadə ötən iki ay müddətində AMİP sədri Yusif Bağırzadənin səhhətində problem olduğunu da xatırladaraq, partiyada bundan başqa problemi olmadığını vurğulayıb.

O, F. Muxtarovun AMİP Siyasi Şurasının bir neçə aydır keçirilməməsi ilə bağlı iradına da münasibət açıqlayıb: “Fuad bəyin bu məsələ barədə açıqlama verməsini yersiz sayıram. Çünki o özü Siyasi Şuranın üzvü olsa da, uzun müddətdir əmək fəaliyyəti ilə əlaqədar partiyadan kənarda qalıb. Fuad Muxtarov BBC kanalının Azərbaycan xidmətində işləyir və bu iş onun partiya fəaliyyətinə mane olur. Ən azından bunu özü deyir. Bu səbəblərdən də Siyasi Şuranın axırıncı toplantılarında iştirak etməyib. Onun iclaslarda iştirak etməyə-etməyə belə açıqlamalar verməsi təəssüf doğurur”.