Daxili siyasət

Ana səhifə

Daxili siyasət

BAXCP sədri: “Bu od onların özlərini də yandırar, amma çox təəssüf ki, Azərbaycanı da yandıra bilər” - AÇIQLAMA

BAXCP sədri: “Bu od onların özlərini də yandırar, amma çox təəssüf ki, Azərbaycanı da yandıra bilər” - <font color=red>AÇIQLAMA</font>

06 sentyabr 2011 15:08 (UTC +04:00)

Bakı-APA. “Hələ «WikiLeaks»in ilk açıqlamaları yayılandan sonra bizim partiyanın rəsmi bəyanatı olmuşdu. Həmin bəyanatda xüsusi olaraq vurğulamışdıq ki, biz bu sənədlərin oğurlanıb yayılmasına inanacaq qədər sadəlövh deyilik. Hesab edirik ki, ABŞ xüsusi xidmət orqanları məlumatları düşünülmüş şəkildə, adi insanları inandıra biləcək formada Assancın əli ilə yayımlayırlar. Yayılan məlumatlara Dövlət Departamentinin müvafiq qurumları, prosesləri dərindən bilən insanlar əl gəzdirirlər. Bizim fikirlərimizi qüvvətləndirən əsas fakt budur ki, yayılan sənədlərdə ABŞ dövlət maraqlarına zərbə vuran hər hansı bir materiala rast gəlmək mümkün deyil. Eyni zamanda ABŞ-ın müttəfiqlərinin maraqlarına ciddi zərbə vuracaq məlumatlara da rast gəlinmir”. APA-nın xəbərinə görə, bu açıqlama ilə Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev çıxış edib.

Q.Həsənquluyev deyib ki, Azərbaycanla bağlı yayılan məlumatların yayılmasında məqsəd qonşularıyla münasibətlərini gərginləşdirmək, Azərbaycanı təzyiqlər qarşısında qoymaq və bundan istifadə edərək öz şərtlərini qəbul etdirməkdən ibarətdir: “Bu şərtlər isə sirr deyil. Azərbaycanı Dağlıq Qarabağ məsələsində güzəştə sövq etmək istəyirlər. Buna baxmayaraq, Azərbaycan Dağlıq Qarabağ məsələsində heç bir güzəştə getməməlidir. İndiki və bundan sonra ola biləcək təzyiqlərdən, təhriklərdən çəkinməməli, qorxmamalıdır. Əksinə, bizim fikrimizcə, Azərbaycan danışıqlardan çıxmalıdır. Diplomatik təcrübədə bu geniş yayılmış bir formadır. Danışıqlar dalana dirənəndə, tərəflərin biri qeyri-konstruktiv mövqe nümayiş etdirəndə danışıqlar dayandırılır”.

BAXCP sədri hesab edir ki, “materiallar redaktə olunmasına baxmayaraq”, milli vətənpərvər qüvvələrin mövqeyinin Azərbaycan prezidenti tərəfindən də sərgiləndiyini «WikiLeaks» yaydığı teleqramlarda görünür: “Bu baxımdan düşünürəm ki, bu teleqramlar onu yayanların gözlədiyi effekti vermədi. Sadə vətəndaşlar gördülər ki, onların prezidentləri gizli danışıqlarda belə sıravi insanlarla eyni mövqedən çıxış edir, eyni düşüncəni bölüşür”.

Partiya sədri həmkarı, AXCP sədri Əli Kərimlinin «Ərəb dərsləri» adlı yazısına da münasibət bildirib. O deyib ki, Ə.Kərimlinin «Allahu-əkbər zalımlardan başqa heç kimi təhdid etmir» ifadəsi siyasi mübarizədə qalib gəlmək üçün bütün qüvvələrlə əməkdaşlığı özü üçün məqbul saymaq meyllərinin göstəricisidir: “Əlbəttə, Azərbaycanın müəyyən problemləri var. Qanunun aliliyi, insan haqları və demokratiya ilə bağlı problemlərimiz mövcuddur. Biz bu problemləri qaldırır, həll olunmasını istəyirik. Amma biz bu problemləri inqilabsız, təkamül yolu ilə aradan qaldırmalıyıq. İnsanlar maarifləndirilməli, inqilaba çağırılmamalıdır. Əli Kərimlinin yazısında təhlükəli meyllər var. «Allahu-əkbər» sədalarından dini-ekstremist qüvvələr də istifadə edirlər. Bu ifadədən istifadə edərək körpələrə, qadınlara, kimsəsiz, günahsız adamlara qarşı terror aktı həyata keçirirlər. «Allahu-əkbər» deyib terror aktı törədən, özünü partladan nə qədər insan görmüşük. Biz «Allahu-əkbər» deyib təyyarəni ABŞ-da ticarət mərkəzinə çırpanları da görmüşük. «Allahu-əkbər» deyən Əhmədinejadın Azərbaycan torpaqlarının 20 faizini işğal edən Ermənistanın dövlət başçısının boyunu necə qucaqladığının şahidi olmuşuq. «Allahu-əkbər» sədaları altında Əfqanıstanda budda abidələrinin necə yerlə-yeksan edilməsi çoxlarının yadındadır. «Allahu-əkbər» sədaları altında İraqda məscidlərin partladıldığını, İranda və Əfqanıstanda narkotik ticarətinin çiçəkləndiyini də həmçinin...”

Q.Həsənquluyev Ə.Kərimlini insanların inancından və dindən siyasi məqsədlər üçün istifadə etməkdə ittiham edib: “Amma dini qüvvələr hakimiyyətə gəlsələr, birinci növbədə Əli Kərimlidən saqqal saxlamağı tələb edəcəklər. Əli Kərimli ciddi düşünməlidir ki, o zaman saqqal saxlaya biləcək, yoxsa yox? Hər bir siyasətçi hər hansı bir çağırış etməzdən öncə Azərbaycan xalqı qarşısında öz məsuliyyətini dərk etməlidir. Biz dindən siyasi məqsədlər üçün istifadənin xeyir gətirmədiyinin hər zaman şahidi olmuşuq. Bu səbəbdən də bizim Konstitusiyada qeyd olunub ki, din dövlətdən ayrıdır. Biz qonşu ölkələrdəki dindarların Ermənistanla ciddi siyasi-iqtisadi əlaqələr qurduğunu da gözəl bilirik, dindən siyasi məqsədlər üçün istifadə edənlərin insanları əsarət altında saxlamasını da... Əslində dindən siyasi məqsədlər üçün istifadə edənlər odla oynayırlar. Bu od onların özlərini də yandırar, amma çox təəssüf ki, Azərbaycanı da yandıra bilər”.