Daxili siyasət

Ana səhifə

Daxili siyasət

Bakıda “PKK – bölgədəki demokratik proseslərin düşmənidir” mövzusunda tədbir keçirilib

13 sentyabr 2011 12:13 (UTC +04:00)

Bakı. Pərvin Abbasov – APA. Bu gün Klassik Xalq Cəbhəsi Partiyasının (KXCP) qərargahında istiqlalçı deputatların iştirakı ilə “PKK – bölgədəki demokratik proseslərin düşmənidir” mövzusunda “dəyirmi masa” keçirilib. APA-nın məlumatına görə tədbirdə istiqlalçı deputatlarla yanaşı, Türkiyənin Azərbaycandakı səfirliyinin nümayəndəsi də iştirak edib.

İstiqlalçı deputat, KXCP sədri Mirmahmud Mirəlioğlu Konstitusiya Aktına imza atmış 42 deputatın adını sadalayıb və onlardan bəzilərinin vəfat etdiyini bildirib.

Tədbirdə istiqlalçı deputat Hacıbala Əzimov geniş məruzə ilə çıxış edərək PKK problemindən danışıb. Onun sözlərinə görə, Ərdoğan hakimiyyəti kürdlər yaşayan ərazilərdə bir sıra sosial yönümlü diqqətçəkən layihələr reallaşdırsa da, bu, PKK-nın Türkiyədə apardığı terrorlu mübarizəni azaltmayıb: “Düzdür, nəticədə kürdlərin bir qismi seçki zamanı Ərdoğanın rəhbəri olduğu AKP-yə səs verdilər. Amma terror dayanmadı. PKK-ya kənar qüvvələrin dəstəyi kəsilmədən onlar dayanmayacaq”.

İstiqlalçı deputatlardan Müsavat Partiyasının başqanı İsa Qəmbər, Vətəndaş Həmrəyliyi Partiyasının (VHP) sədri Sabir Rüstəmxanlı, sabiq təhsil naziri Firudin Cəlilov, sabiq müdafiə naziri Rəhim Qazıyev, Tahir Kərimli mövzu ətrafında çıxış edərək PKK-nın fəaliyyətini pisləyiblər. F. Cəlilov deyib ki, “PKK” sözü ilə “kürd” kəlməsini qarışdırmaq olmaz.

Türkiyənin Azərbaycandakı səfirliyinin əmniyyət müşaviri İsmayıl Çağlayan tədbir təşkilatçılarına təşəkkür edib.