Daxili siyasət

Ana səhifə

Daxili siyasət

İranda həbsdə olan jurnalist Səid Muğanlıya qarşı irəli sürülmüş ittiham dəyişdirilib

14 sentyabr 2011 14:12 (UTC +04:00)

Bakı. Ramil Məmmədli – APA. İranda türk dilində yazan tanınmış şair-publisist, jurnalist Səid Muğanlıya qarşı irəli sürülən ittiham dəyişdirilib.

APA-nın İrandakı mənbələrə istinadən verdiyi məlumata görə, prokurorluq orqanları əsaslı sübut olmadığından ittihamı yüngülləşdirib. İttihama görə, jurnalist İrana dost olmayan ölkənin mətbuat orqanı ilə əməkdaşlıqda da günahlandırılıb.

Məlumatda S. Muğanlının vəkilinin Urmiyada baş verən aksiyalarda iştirakda ittiham olunaraq, saxlanıldığı, ailə üzvləri ilə görüşən jurnalistin səhhətində ciddi problemin olmadığı da bildirilib.

Qeyd edək ki, bir müddət öncə Səid (Məhəmmədi) Muğanlı iyunun 5-də valideynlərinin yaşadığı İranın Muğan bölgəsinin Yelsu kəndindəki evlərində saxlanılıb. Evdə axtarış aparılıb və ona məxsus kompüter, kitablar və digər şəxsi əşyalar götürülüb. Bu səbəbdən də İran İnformasiya və Təhlükəsizlik Nazirliyinin əməkdaşları onu saxlayan zaman ədəbi fəaliyyəti ilə maraqlanıblar və əlyazmaları müsadirə olunub. İstintaq orqanı S. Muğanlını İranın dövlət quruluşu, milli təhlükəsizliyinə qarşı fəaliyyətdə və bu ölkədə fəaliyyəti qadağan olunmuş azərbaycanlıların hüquqları uğrunda mübarizə aparan təşkilatlarla əməkdaşlıqda ittiham edib. Hazırda S. Muğanlı Təbriz şəhərindəki təcridxanada saxlanılır.

Xatırladaq ki, Səid Muğanlı Azərbaycan tükcəsində yazılan ədəbiyyat nümunələrini əski əlifbaya çevirərək İrandakı türklərin maariflənməsi işində aktiv iştirak edən şəxslərdən biridir. O, 2007-2008-ci illərdə Bakıda keçirilən ədəbi məclislərin iştirakçısı olub. Bakıdan qayıtdıqdan sonra İranın dövlət quruluşuna xələl gətirə biləcək fəaliyyətdə ittiham olunaraq İran İnformasiya və Təhlükəsizlik Nazirliyi tərəfindən tutulub. Bir müddət sonra isə girov müqabilində şərti olaraq sərbəst buraxılıb.