Daxili siyasət

Daxili siyasət

Sərdar Cəlaloğlu: “İqbal Ağazadə namizədliyini versə, “Qarabağ” blokunun namizədi olacaq, amma digər partiyaların onun namizədliyinə münasibəti birmənalı deyil”

19 sentyabr 2011 09:48 (UTC +04:00)

Bakı. Ramil Məmmədli-APA. Müttəfiqlik təşəbbüsü ilə çıxış edən bir qrup müxalifət partiyası arasında 2013-cü ildə keçiriləcək prezident seçkiləri ilə bağlı məsələ fikir ayrılığı yaranıb.

Bu barədə APA-ya açıqlama verən Azərbaycan Demokrat Partiyasının (ADP) sədri Sərdar Cəlaloğlu deyib ki, Klassik Xalq Cəbhəsi, Liberal, Vətəndaş və İnkişaf, Demokrat və Ümid partiyalarının sədrlərinin iştirakı ilə görüşdə bu məsələ müzakirəyə çıxarılıb: ““Qarabağ” blokunda prezident seçkisində vahid namizədlə çıxış etməklə bağlı razılıq var. Ümumiyyətlə isə prezident seçkisində digər liderə və müttəfiqimizə istənilən güzəştə getməyə hazıram. Bu baxımdan nəzəri olaraq ortaya çıxan budur ki, İqbal Ağazadə namizədliyini verəcəksə, blokun namizədi olacaq. Amma digər partiyaların İqbal Ağazadənin namizədliyinə münasibəti birmənalı deyil. Çünki adı çəkilən partiyaların prezident seçkisində iştirak edib-etməyəcəkləri məlum deyil”.

S. Cəlaloğlunun fikrincə, adı sadalanan partiyalar arasında hər hansı bir birlik yaradılacaqsa, bu müttəfiqlik institutu prezident seçkilərinə münasibəti nəzərə alıb yaradılmalıdır. Çünki 2015-ci il parlament seçkilərinə gedən yol prezident və bələdiyyə seçkilərindən keçir: “Müttəfiqlərimiz olan VİP və ALP isə bu məsələdə indi qərar verilməsinin məqbul olmadığını, yalnız seçkilərə az müddət qalmış müzakirə edilməsinin mümkünlüyünü deyirlər. Biz isə hesab edirik ki, indidən bu məsələlərə aydınlıq gətirilməsə yaradılması nəzərdə tutulan birliyin taleyi sual altına düşə bilər”.

ADP sədri bildirib ki, birliyin yaradılması ilə bağlı hələlik 5 partiya ilə təmaslar, eyni zamanda AXCP və Müsavatla danışıqlar davam etdirilir: “Müxalifət vahid güc mərkəzində birləşməli, kölgə parlamentini ortaya qoymalı, proqramını və ideyalarını elan etməlidir. Bu indiki dövrdə siyasi situasiyanın dəyişdirilməsi üçün önəmli addım olardı”.

Qeyd edək ki, bir müddət əvvəl Klassik Xalq Cəbhəsi, Liberal, Vətəndaş və İnkişaf, Demokrat və Ümid partiyalarının sədrləri inteqrasiya ilə bağlı görüş keçiriblər.