Daxili siyasət

Daxili siyasət

Qüdrət Həsənquliyev: “Azərbaycan Türkiyənin İsraillə bağlı istəklərini tərəddüdsüz yerinə yetirməlidir”

20 sentyabr 2011 12:59 (UTC +04:00)

APA-nın məlumatına görə, partiyanın mətbuat xidmətinə açıqlamasında BAXCP sədri qeyd edib ki, Azərbaycan Türkiyənin İsraillə bağlı istəklərini tərəddüdsüz yerinə yetirməlidir.

İki ölkə arasındakı bütün məsələlərin açıq və şəffaf şəkildə müzakirəsinin tərəfdarı olduğunu vurğulayan Q. Həsənquliyev deyib ki, bütün arzuolunmaz məqamlara rəğmən hər zaman olduğu kimi türk qardaşlarımızın yanında olmalıyıq: “Azərbaycan torpaqları işğal olunarkən və 20 ildən artıq torpaqlarımızın işğal altında qalmasına, bir milyondan artıq Azərbaycan türkünün qaçqın və məcburi köçkün vəziyyətində yaşamasına baxmayaraq, Türkiyənin vəziyyəti dəyişmək üçün Azərbaycana verdiyi dəstəyi yetərli saymamışıq, ancaq hər zaman qiymətləndirmişik. Biz Elçibəyin prezident olduğu və işğala qarşı savaşın ən şiddətli dönəmində Türkiyənin Ermənistanı taxılla təmin etməsini də, Azərbaycan prezidentinin Kəlbəcərin işğalı zamanı dinc sakinlərin köçürülməsi üçün Türkiyədən iki mülki vertolyot istəməsinə “yox” deyilməsini də ürək ağrısı ilə xatırlayırıq”.

Q. Həsənquliyev Türkiyənin Ermənistanla qurduğu iqtisadi və digər əlaqələrin işğalçı dövləti ayaq üstündə saxladığının fərqində olduqlarını söyləyib: “Türkiyə hökuməti Ermənistanla sərhədləri açmaq üçün Azərbaycandan gizli hansı cəhdləri edib, bilirik. Bütün bunlara baxmayaraq, bizim İsraili də Azərbaycanın dostu saymağa mənəvi haqqımız yoxdur. Ən azından Azərbaycana qarşı ABŞ Nümayəndələr Palatasında “Azadlığa Yardım Aktı”na 907-ci düzəliş qəbul olunanda yəhudi lobbisinin lazımi dəstəyini görmədik, İsrail BMT-də Azərbaycanın ərazi bütövlüyünə səs vermədi. İranın təzyiqlərinə baxmayaraq, İsraillə etdiyimiz əməkdaşlığın əvəzində İsraildən əhəmiyyətli kömək almamışıq”.

Partiya sədri bəyan edib ki, İsraillə əməkdaşlığın dayandırılması Azərbaycan üçün ciddi problemlər yaratsa da, türkçülüyün mərkəzi olan Azərbaycan qardaş Türkiyə üçün fədakarlıq etməli və İsraillə münasibətlərdə Türkiyənin istədiklərini yerinə yetirməlidir: “Mən İctimai Palatanı və digər müxalifət partiyalarını da bu mövqedən Azərbaycan hökumətinə müraciət etməyə çağırıram”.

qüdrət_həsənquliyev