Daxili siyasət

Daxili siyasət

İctimai Palata “Wikileaks. Dünya, region, Azərbaycan” mövzusunda müzakirələr keçirib

21 sentyabr 2011 13:40 (UTC +04:00)

Bakı. Ramil Məmmədli – APA. İctimai Palata “Wikileaks. Dünya, region, Azərbaycan” mövzusunda müzakirələr keçirib. Məruzəçi kimi çıxış edən “Şərq-qərb” Araşdırmalar Mərkəzinin rəhbəri Ərəstun Orucov deyib ki, “Wikileaks” dünyanı dəyişmək istəyən güclərin qlobal silahıdır. O, adıçəkilən saytda yer alan açıqlamalardan əvvəl və sonra gedən proseslər haqqında danışıb.

Müzakirələrə qatılan AXCP sədrinin müavini Nurəddin Məmmədli, keçmiş deputat Pənah Hüseyn, Müsavat Partiyası başqanının müavini Tofiq Yaqublu, politoloq Səfər Quliyev, İP üzvü Mehriban Vəzir bu açıqlamalardan sonra dünyada, bölgədə və Azərbaycan baş verən proseslərə diqqəti yönəldiblər, həmçinin hazırkı vəziyyətdə müxalifətin üzərinə düşən vəzifələr təhlil olunub.

P. Hüseyn Türkiyə-İsrail münasibətlərinə toxunaraq, Azərbaycanın bu vəziyyətdə Türkiyənin yanında olmasının vacibliyini qeyd edib. O, İctimai Palatanın bu məsələdə mövqeyinin qəti şəkildə açıqlamasının zəruriliyini vurğulayıb.

T. Yaqublu isə Türkiyə-İsrail münasibətlərinin kəskinləşməsinin yaranmasına səbəb olan əsas amilin Rəcəb Tayyip Ərdoğan olduğunu bildirib. Onun sözlərinə görə, Türkiyənin İsrailə olan münasibətinin kəskinləşməsi Ərdoğanın hislərindən irəli gəlir.

S. Quliyev və M. Vəzir “Wikileaks”də açıqlanan informasiyaların Azərbaycan üçün bir ismarış olduğunu deyiblər.

Müsavat partiyasının başqanı İsa Qəmbər isə deyib ki, adıçəkilən saytda yer alan informasiyaların köməkliyi ilə reallıqları anlamalıdırlar. İ. Qəmbər də Türkiyə-İsrail münasibətlərinə toxunub: “Türkiyə ilə Azərbaycan bu məsələ ilə bağlı birgə müzakirələr aparmalıdır”.

AXCP sədri Əli Kərimli isə çıxışını mövcud Azərbaycan iqtidarını tənqid etməklə qurub. O, “Wikileaks”-də Azərbaycanla bağlı yer alan informasiyaları təhlil edib.