Daxili siyasət

Ana səhifə

Daxili siyasət

Prezident İlham Əliyev Quba rayonunda bir neçə obyektin açılışında iştirak edib

24 sentyabr 2011 17:09 (UTC +04:00)

Bakı – APA. Azərbaycan prezidenti İlham Əliyev Quba rayonuna səfəri çərçivəsində Quba avtovağzalının yeni binasının açılışında iştirak edib.
Prezidentin mətbuat xidmətindən APA-ya verilən məlumata görə, nəqliyyat naziri Ziya Məmmədov məlumat verib ki, son illər ölkənin nəqliyyat sisteminin təkmilləşdirilməsi, sərnişindaşımalarının beynəlxalq səviyyədə qurulması istiqamətində mühüm layihələr icra olunur. Bu istiqamətdə nəinki paytaxt Bakıda, eyni zamanda regionlarda müasir standartlara cavab verən avtovağzalların tikintisinə başlanılmışdır. Bu avtovağzallardan biri də Quba şəhər avtovağzalıdır. Müasir memarlıq üslubunda inşa olunan avtovağzalın tikinti sahəsi 522 kv. metrdir. Avtovağzal binasının fasiləsiz elektrik enerjisi və daimi su ilə təmin olunması məqsədilə transformator stansiyası, su anbarı və nasosxana tikilib. Ərazidə yaşıllıq salınıb, dekorativ ağaclar əkilib. Avtovağzal binasında sərnişinlərin istirahəti üçün lazımi şərait yaradılıb, müasir havalandırma sistemi quraşdırılıb.

Prezident İlham Əliyevə bildirilib ki, avtovağzal kompleksinin ərazisində əsas və köməkçi binalar inşa olunub. Binanın birinci mərtəbəsi əsas girişdən, ana və uşaq otağından, perrona iki çıxışdan, kassa otağından, kafedən, sahəsi 133 kv. metr olan zaldan ibarətdir. Binanın ikinci mərtəbəsində isə sahəsi 68,8 kv. metr olan iclas zalı, istirahət guşəsi və inzibati otaqlar yerləşir. İkimərtəbəli avtovağzal binasının fasadı yüngül profilli metal konstruksiyadan, şüşə və alkopon materialdan inşa edilib. Daxili divarlar və arakəsmələr isə mişar daşı və kərpicdən tikilib.
Avtovağzal paytaxt Bakıya və əks istiqamətdə, o cümlədən Rusiyaya gedən avtobusların və sərnişinlərin buradan yüksək səviyyədə istifadəsi üçün bütün lazımi avadanlıqla təchiz edilib. 2011-ci ilin “Turizm ili” elan edilməsi və Quba rayonunun da turizm baxımdan cəlbedici ərazi olması buraya turistlərin axınını sürətləndirib. Yeni avtovağzalın inşası isə rayona gələn turistlərin də rahatlığına xidmət edəcək.

Həmin gün prezident İlham Əliyev Qubada Heydər Əliyev Mərkəzinin və Şahmat Məktəbinin açılışında iştirak edib, həmçinin Qubanın Əski-İqriq kəndində beşulduzlu “Rixos” otelinin tikintisi və Qubada Nizami adına mədəniyyət və istirahət parkında aparılan yenidənqurma işləri ilə tanış olub.