Daxili siyasət

Ana səhifə

Daxili siyasət

Müsavat Məclisinin sessiyası çağırılıb

26 sentyabr 2011 13:53 (UTC +04:00)

Bakı. Pərvin Abbasov – APA. Bu gün Müsavat Partiyası Divanının növbəti toplantısı keçirilib. Partiyanın mətbuat xidmətindən APA-ya bildirilib ki, gündəliyin görülmüş işlərə dair bölümündə 2 aprel məhbuslarının məhkəməsində müxalifət liderlərinin şahid qismində ifadə verdikləri haqqında məlumat verilib. Divan belə hesab edir ki, 2 aprel məhbusları dərhal azad edilməlidir.

Partiya Məclisinin növbəti sessiyasının çağırılması haqqında məsələ müzakirə edilib. Qərara alınıb ki, sessiya oktyabrın 2-də saat 11:00-da Müsavat Partiyasının mərkəzi qərargahında çağırılsın.

Daha sonra Müsavat Partiyasının 100 illik yubileyinə hazırlığın gedişi müzakirə olunub. Yubiley tədbirinə yer ayrılması ilə bağlı müzakirələr aparılıb. Oktyabrın 8-də yubiley tədbirinə yer ayrılması haqda partiya tərəfindən Bakı Şəhər İcra Hakimiyyətinə göndərilmiş rəsmi müraciətə hələ də cavab verilmədiyi qeyd edilib. Görüləcək texniki işlər bir daha dəqiqləşdirilib və konkret tapşırıqlar verilib.

Sonda cari məsələlərə baxılıb.

Divanın toplantısından sonra Qurultaya Hazırlıq üzrə Təşkilat Komitəsinin növbəti toplantısı keçirilib.