Daxili siyasət

Daxili siyasət

Azərbaycan Milli Məclisinin 2011-ci il payız sessiyasının ilk iclası başlayıb

30 sentyabr 2011 09:13 (UTC +04:00)

APA-nın məlumatına görə, sessiya Azərbaycanın Dövlət Himninin oxunması ilə açılıb. Parlamentin spikeri Oqtay Əsədov bildirib ki, millət vəkilləri Milli Məclisin yaz və növbədənkənar iclaslarında aktiv iştirak edib: “Bu dövrdə 14 iclas keçirilib. Millət vəkilləri sessiya dövründə ölkənin ictimai-siyasi həyatında aktiv rol oynayıblar”.
O. Əsədov qeyd edib ki, bir neçə gün sonra parlamentdə MDB Parlament Assambleyasının hüquq komitəsinin və Mərkəzi Seçki komissiyalarının iştirakı ilə iclas, oktyabrın 11-də isə Azərbaycan parlamenti tarixində ilk dəfə olaraq bir neçə parlament assambleyasının birgə böyük konfrans keçiriləcək.
Noyabrın 2-də isə TürkPA ilk komissiya iclası, dekabrda AŞ PA-nın komitə iclası olacaq.

Qeyd edək ki, sessiyanın bu gün keçirilən ilk iclasının iş planına 27 məsələ daxildir. Bunlardan 14-ü dövlətlərarası (Ukrayna, Rumıniya, Belarus, İspaniya, Yunanıstan, Birləşmiş Ərəb Əmirlikləri, Serbiya, Sloveniya) sazişdir.

İclasda, həmçinin Cinayət Məcəllə, İnzibati Xətalar Məcəlləsi, Mülki Məcəllə, "Konstitusiya Məhkəməsi haqqında", "Daşınmaz əmlakın dövlət reyestri haqqında", "İstehlakçıların hüquqlarının müdafiəsi haqqında", "Dövlət rüsumu haqqında", "Əlilliyin və uşaqların sağlamlıq imkanları məhdudluğunun qarşısının alınması, əlillərin və sağlamlıq imkanları məhdud uşaqların reabilitasiyası və sosial müdafiəsi haqqında", "Sosial sığorta haqqında", "Məşğulluq haqqında" qanunlara dəyişikliklər, həmçinin, Goranboy rayonunun Cinli Boluslu kəndinin Boluslu kəndi adlandırılması haqqında qanun layihəsi müzakirə olunacaq.

Milli Məclis _ payız sessiyası