Daxili siyasət

Ana səhifə

Daxili siyasət

Milli Məclisin payız sessiyasının ilk iclasında millət vəkilləri bir sıra təkliflərlə çıxış ediblər

30 sentyabr 2011 10:44 (UTC +04:00)

APA-nın məlumatına görə, iclasda çıxış edən millət vəkili Zahid Oruc «İnformasiya təhlükəsizliyi» haqqında qanunun qəbulunun vacibliyini vurğulayıb. Hazırda ölkənin informasiya məkanının xarici təsirlər altında olduğunu deyən millət vəkili belə bir qanunun qəbulunun zərurətə çevirdiyini bildirib.

Millət vəkili Fazil Mustafa isə bir sıra vəkillərin fəaliyyətlərinə görə, Vəkillər Kollegiyasından qanunsuz çıxarılmasına etiraz edib. Deputat Vəkillər Kollegiyasında islahatların aparılmasını, rəhbər dəyişikliyinin vacibliyini vurğulayıb: «Qarşıdan Azərbaycanın dövlət müstəqilliyinin 20 illiyi gəlir. Müstəqilliyinin əldə olunmasında rolu olan şəxslərin bir qismi – Arif Hacılı, Nemət Pənahlı həbsdədir. Bu yaxınlarda sabiq prezident Ayaz Mütəllibovun ölkəyə qayıtmasına icazə verildi. Müstəqilliyin 20 illiyi ilə əlaqədar həbsdə olanların bağışlanması alicənab addım olardı».

Deputat həmkarı Fazil Mustafanın fikirlərini dəstəkləyən deputat İlyas İsmayılov isə «Siyasi paritiyalar haqqında» qanunun qəbulunun vacibliyini vurğulayıb.

Deputat İqbal Ağazadə isə 2 aprel aksiyası zamanı həbs olunan çoxsaylı insanların hələ də istintaq altında olmasından danışıb. O istintaq getdiyi halda bu insanların həbsdə saxlanılmasının məhkəmələrin fəaliyyətini şübhə altında qoyduğunu, bu kimi məsələlərin Azərbaycanı yenidən beynəlxalq təşkilatların qara siyahısına salacağını düşündüyünü bildirib: «Çox təəssüf olunsun ki, həbsdə olanların hüquqlarını müdafiə edən vəkillərə qarşı Azər Tağıyev adlı adam ağlına gələn qərarı qəbul edir. Yatır yuxuda nə görür, səhər ağlına gələn qondarma qərarı yazır».

Deputat Qüdrət Həsənquliyev isə çıxışında dövlət müstəqilliyinin 20 illiyi münasibəti ilə parlamentin xüsusi iclasının keçirilməsini, müstəqilliyə imza atmış insanların «İstiqlal» ordeni ilə təltif olunması üçün dövlət başçısına müraciət edilməsini təklif edib. O həmçinin mili azadlıq hərəkatının lideri Əbülfəz Elçibəyin ölümündən sonra ali mükafatla təltif olunmasının vacibliyini vurğulayıb. Millət vəkili Milli Məclisin ilk üzvlərinin və onların ailələrinin sosial müdafiəsinin gücləndirilməsi barədə ayrıca qanun layihəsinin qəbulunu təklif edib.

Çıxış edən digər deputatlar isə əsas diqqəti təhsil sahəsində problemlərin həllinə, müharibə veteranlarının sosial şəraitinin yaxşılaşdırılması, ictimai yerlərdə siqaretin satışı və çəkilməsinin məhdudlaşdırılması, həmçinin seçicilərin təkliflərinə yönəldiblər.

Daha sonra parlamentin bugünkü iclasının gündəliyi təsdiqlənib.