Daxili siyasət

Ana səhifə

Daxili siyasət

Mirəşrəf Fətiyev: “Azərbaycan vətəndaşının DAK sədri olması yolverilməzdir” - MÜSAHİBƏ

Mirəşrəf Fətiyev: “Azərbaycan vətəndaşının DAK sədri olması yolverilməzdir” - <font color=red>MÜSAHİBƏ</font>

03 oktyabr 2011 12:45 (UTC +04:00)

Moskva. Fərid Əkbərov - APA. Dünya Azərbaycanlıları Konqresinin (DAK) İdarə Heyətinin üzvü Mirəşrəf Fətiyevin APA-nın Moskva müxbirinə müsahibəsi

- DAK-da bu gün nələr baş verir?
- Dünya Azərbaycanlıları Konqresində pərakəndə vəziyyət yaranıb. Bunun səbəbi 2 il qabaq DAK-ın qurultayında konqres üzvlərindən bir neçə nəfərinin etiraz edərək qurumdan ayrılmasıdır. İdarə Heyətinin üzvləri olaraq belə fikirləşdik ki, Sabir Rüstəmxanlını və Cənubi Azərbaycandan olan Firudin Pərvizniyazı dəvət edək. Onlarla işləməyə başladıq. Lakin bu şəxslər DAK-ın fəaliyyətini 2 il dondurulmuş şəkildə saxladılar. Keçən ilin dekabrında quruma normal rəhbər seçmək məqsədilə qurultay keçirdik. Avropada yaşayan Cənubi azərbaycanlılar məndən xahiş elədilər ki, DAK-a mən rəhbərlik edim. Ona görə DAK-a həmsədr seçimində mən də namizədliyimi irəli sürdüm. Elə oldu ki, mən, Sabir Rüstəmxanlı, Firudin Pərvizniyaz və Behruz Həqqi həmsədr seçildik. Təklif belə idi ki, iki həmsədr Şimali Azərbaycandan, iki həmsədr də Cənubi Azərbaycandan seçilsin. DAK-a başqanlığa səsvermə keçirilən zaman, qurultay iştirakçıları və İdarə Heyəti mənə səs verdi. Səs çoxlugu ilə mən sədr seçildim. Bu zaman qarşı tərəf səs-küy salmağa başladı, qurultay iştirakçıları arasında narazılıq yarandı. Mən İdarə Heyətini yığaraq namizədliyimi geri götürə biləcəyimi bildirdim. Belə bir şərtim oldu ki, məni sədr kimi görmək istəyənlərin sözləri dinləniləcək. Məni sədr kimi görmək istəyən qurultay iştirakçıları DAK-ın qeydiyyat probleminin hələ də həll olunmadığını və təşkilatın mərkəzi ofisinin olmadığını söylədilər. Onlar ümidvar idilər ki, mən bunu yaradacam. Mən də orada dedim ki, əgər Sabir Rüstəmxanlı bu işlərin öhdəsindən gələ biləcəksə, mən öz namizədliyimi geri götürürəm. Sabir Rüstəmxanlı qurultayda söz verdi ki, 6 ay ərzində deyilən məsələlərin hamısını həll edəcək. Artıq 1 ilə yaxındı, deyilən işlərin heç biri həll olunmayıb. Sabir Rüstəmxanlı bu gün DAK sədrliyinə alternativ namizədləri görmək istəmir. Özü isə bu vəzifənin öhdəsindən gələ bilmir.

- Sizi DAK-ın Rusiya nümayəndəliyindən nə üçün uzaqlaşdırdılar?
- Bu ilin fevralında DAK-ın İdarə heyətinin Türkiyədə yığıncağını keçirdilər. Mən həmin vaxt Moskvada Xocalı faciəsi ilə bağlı tədbir keçirdiyimdən yığıncağa gedə bilmədim. Həmin yığıncaqda Sabir Rüstəmxanlı və onun ətrafında olan Əjdər Tağızadə kimi insanlar mənim yaxşı fəaliyyət göstərmədiyimi söyləyərək, DAK-ın Rusiya nümayəndəliyindən uzaqlaşdırılmağımı təklif ediblər. Mən bu söhbətdən xəbər tutan kimi, İdarə Heyətinin digər üzvü Tahir Hacıyevə zəng elədim. Ona İdarə Heyətində səs çoxluğu olacağı təqdirdə gedə bilcəyimi söylədim. Bir şərtlə ki, yerimə müvəqqəti Tahir Hacıyev təyin olunsun. Başqa adamın təyin olunmasını istəmədim. Çünki DAK-ın Rusiyada qeydiyyatını mən həll eləmişəm. Təşkilat üçün Rusiyada çox iş görmüşəm. Bu gün isə Sabir Rüstəmxanlı və Əjdər Tağızadə belə hərəkətlər edirlər. Özlərini gündəmdə saxlamaq üçün əllərindən gələni əsirgəmirlər. Sabir Rüstəmxanlı bir şair kimi xalqın və mənim sevimli şairim ola bilər. Amma haqqımda dediyi fikirlər ona yaraşmır. Sabir Rüstəmxanl DAK-a çəkdiyi xərcləri sadalaya bilməz, çünki heç bir iş görməyib. O, DAK rəhbəri olduğu vaxtlar və ondan da əvvəl DAK-ın qurultayları mənim maddi vəsaitim hesabına keçirilib. DAK üzvləri də yaxşı bilir ki, mən olmadan bunlar həyata keçirilə bilməz. Bu gün o sədr kimi heç bir bacarığa malik deyil. Təşkilatın fəaliyyətini dondurub. Sabir Rüstəmxanlı və Əjdər Tağızadə barmağını qatlayıb deyə bilərlər ki, DAK üçün ölkə hüdudlarından kənarda nəsə ediblər? Mən İranla dost olan bir dövlətdə DAK-ın Rusiya nümayəndəliyini qeydiyyatdan keçirmişəm. Lakin bu təşkilat hələ Azərbaycanda qeydiyyatdan keçməyib. İldə ən azı 150 min avro vəsaitimi DAK üçün xərcləyirəm. Bunu Sabir Rüstəmxanlı edə bilər?! Hal-hazırda DAK-ın nümayəndəliyinin sədri olmasam da, burdakı azərbaycanlılar yenə mənə müraciət edirlər. Bundan sonra da DAK və burdakı azərbaycanlılar üçün əlimdən gələni əsirgəməyəcəyəm. Sabir Rüstəmxanlı DAK-ın ancaq fəxri sədr ola bilər, DAK-ın gerçək sədri təşkilat üçün maddiyatını sərf edən və ölkə hüdudlarından kənarda nüfuza malik azərbaycanlılar olmalıdır. Azərbaycan vətəndaşı DAK-ın sədri ola bilməz. Əgər DAK diaspor qurumudursa, belə olduğu halda diaspora diaspor rəhbərlik etməlidir, yəni, tarixi vətənindən köçənlər. Müqayisə üçün deməliyəm ki, ABŞ-da gələn il 40 yaşını qeyd edəcək ABŞ-Erməni Assambleyası fəaliyyət göstərir, sizcə ona İrəvandan kimsə nə isə diqtə edə bilər?! Ölkə hüdudlarından kənarda nüfuza malik insanlar İsveçdə, Rusyada və Avropanın bir sıra ölkələrində var. Bunu Sabir Rüstəmxanlının özünə də demişəm. Ona görə də, o məni bu qurumdan uzaqlaşdırmaq istəyir.

- Sizin İran və Rusiya kəşfiyatına işləməyiniz barədə səslənilən fikirlərə münasibətiniz necədir?
- Bunlar şərdən başqa bir şey deyil. Mən Rusiya vətəndaşıyam, dövlət işində çalışıram, federal əhəmiyyətli layihələrin müəllifiyəm. Rusiya digər ölkənin agentinə belə məsuliyyətli sahələri etibar edərmi?! İranla əlaqələrimə gəldikdə isə, orada doğma dayım yaşayır. İranla sərhədlər açılandan sonra dayımla bir neçə dəfə görüşmüşəm. Bu məni ləkələmək üçün deyilən sözlərdir. Sabir Rüstəmxanlının ətrafında isə İrana işləyən adamlar çoxdur. O birinci növbədə öz ətrafına fikir verməlidir. Sabir Rüstəmxanlının kənardan mənim ünvanıma lazımsız ifadələr işlətməsi bizim işlərin ləngiməsinə səbəb olur. DAK-ın əsas məqsədi Güney azərbaycanlıların azadlığa çıxmasıdır. Amma çox təəssüf olsun ki, başımız belə lazımsız işlərə qarışıb.

- DAK-da birləşmək istiqamətində nə kimi işlər görülür?
- Bu yaxınlarda Dünya Azərbaycanlıları Konqresinin birlik qurultayı keçiriləcək. Bu qurultay Avropada yaşayan azərbaycanlıların tələbi ilə keçirilir. Qurultayın keçirilməsini Əhməd Obalı və Paşa Qəlbinur da dəstəkləyirlər. Biirlik qurulayının keçirilməsinə maneçilik edən Sabir Rüstəmxanlı və onun ətrafıdır. Buna baxmayaraq birlik qurultayına hazırlıq gedir.

DAK