Daxili siyasət

Ana səhifə

Daxili siyasət

SAM-ın keçirdiyi müsabiqənin qaliblərinin təltif olunması mərasimi keçirilib

13 oktyabr 2011 10:13 (UTC +04:00)

Bakı. Viktoriya Dementyeva-APA. Bu gün Bakıda Azərbaycan Prezidenti yanında Strateji Araşdırmalar Mərkəzinin təşkil etdiyi və Azərbaycanın müstəqilliyinin 20 illiyinə həsr olunmuş müsabiqənin qaliblərinin təltif olunması mərasimi keçirilib. APA-nın məlumatına görə, tədbirdə çıxış edən mərkəzin direktor müavini Gülşən Paşayeva bildirib ki, müsabiqənin keçirilməsində məqsəd yeni istedadların, siyasət, tarix, hüquq, fəlsəfə, beynəlxalq hüquq və beynəlxalq münasibətlər, iqtisadiyyat sahəsində təhsil alan analitik təfəkkürə malik gənclərin ortaya çıxarılmasıdır.
Mərasimdə çıxış edən Milli Məclisin beynəlxalq münasibətlər və parlamentlərarası əlaqələri komitəsinin sədri Səməd Seyidov qeyd edib ki, Azərbaycanda gənclərə öz istedadlarını üzə çıxarmaq üçün geniş imkanlar yaradılıb. Onun sözlərinə görə, müsabiqəyə təqdim edilən işlər dünya standartlarına uyğundur.
Azərbaycan Prezidenti yanında Elm Fondunun rəhbəri Elçin Babayev dövlətin təhsil siyasəti barədə danışıb. O qeyd edib ki, hər il büdcədən təhsil sahəsinə ayrılan vəsaitin miqdarı artırılır. Elm Fondunun maliyyələşdirilməsi üçün ayrılan vəsait də ötən ilə nisbətə artırılaraq 6,6 milyon manata çatdırılıb.
Müsabiqədə xarici siyasət, daxili siyasət və iqtisadiyyat üzrə işlər təqdim edən Azərbaycan ali məktəblərinin bakalavr və magistrləri, həmçinin xarici ölkələrdə təhsil alan soydaşlarımız iştirak ediblər. 10 tələbə qalib elan olunub, daha 13 tələbəyə sertifikatlar verilib.