Daxili siyasət

Ana səhifə

Daxili siyasət

Azərbaycan Milli Məclisinin dövlət müstəqilliyinin 20 illiyinə həsr olunmuş iclasında deputatlar çıxış ediblər

18 oktyabr 2011 11:23 (UTC +04:00)

APA-nın məlumatına görə, iclasda çıxış edən Milli Məclis sədrinin birinci müavini Ziyafət Əsgərov Azərbaycan dövlətçiliyinin tarixindən danışıb. 1991-ci ildə Azərbaycanın müstəqillik əldə etdiyi dövrdə qarşılaşdığı problemlərdən bəhs edən Z. Əsgərov xatırladıb ki, kənar qüvvələrin təsiri nəticəsində ölkə dağılma təhlükəsi ilə üzləşmişdi, bundan istifadə edən Ermənistan Azərbaycan torpaqlarının işğalını gündən-günə genişləndirirdi: “Heydər Əliyev olmasaydı, Azərbaycanın dövlət müstəqilliyi sual altında idi. İlk olaraq o, Azərbaycan parlamentinin sədri seçildi. Həmin dövrdə Milli Məclis ölkədə baş verən proseslərin açıq müzakirə olunduğu tribunaya çevrildi”.

Heydər Əliyevin ordu quruculuğuna böyük diqqət yetirdiyini deyən Z. Əsgərov Azərbaycan ordusunun 1993-cü ilin sonları, 1994-cü ilin əvvəllərində düşmənə ağır zərbələr vurduğunu, bundan sonra cəbhə xəttində atəşkəsə dair müqavilə imzalandığını bildirib. O, parlamentin müstəqillik dövründəki fəaliyyətindən də danışıb: “16 ilə yaxındır parlament qanunvericilik səlahiyyətlərini uğurla həyata keçirir. 1995-ci ildən bu yana Milli Məclis 3200-dən çox qanun və qərar qəbul edib. Təcrübəmiz göstərir ki, parlament əsl demokratiya məktəbidir. Parlament demokratik təsisatları möhkəmləndirir və nəticə etibarilə hüququn aliliyinin təmin olunmasına zəmanət yaradır. Milli Məclis beynəlxalq təşkilatlarda Ermənistanın Azərbaycana qarşı təcavüzünün ifşa edilməsi, müvafiq qərarların qəbulu ilə bağlı uğurlu fəaliyyət göstərir”.

Millət vəkili Vahid Əhmədov qeyd edib ki, müstəqillik çox çətin və mürəkkəb şəraitdə əldə olunub: “Müstəqilliyə gələn yolda bir sıra çətinliklərlə qarşılaşdıq. Ali Sovet SSRİ-nin saxlanılması barədə referendum keçirilməsinə qərar verdi. Naxçıvan Ali Soveti isə belə bir referendumun keçirilməməsi barədə qərar qəbul etdi. Bakıda Ali Sovetdə keçirilən səsvermədə deputatların yalnız 43 nəfəri müstəqilliyə səs verdi. Mən fəxr edirəm ki, müstəqilliyə səs verən 43 nəfərdən biriyəm”.

V. Əhmədov Azərbaycanın müstəqillik dövründə əldə etdiyi iqtisadi nailiyyətlərdən danışıb və bunu 1994-cü ildə imzalanmış “Əsrin müqaviləsi”nin nəticəsi kimi qiymətləndirib: “Lakin atəşkəsdən 17 il keçməsinə baxmayaraq, biz Qarabağ məsələsinin həllində nəyəsə nail ola bilmirik. Hesab edirəm ki, Azərbaycan öz torpaqlarını hərbi yolla azad edəcək. Azərbaycanın güclü ordusu var”.

Fazil Mustafa isə bildirib ki, Azərbaycan xalqının yalnız bir hissəsi müstəqilliyə nail olub, Azərbaycan xalqının 35 milyonluq digər hissəsi də vaxt gələcək, müstəqilliyə nail olacaq. F. Mustafa hesab edir ki, müstəqilliyə səs verənlərlə verməyənləri ayırmaq lazım deyil: “Yaxşı olardı ki, o dövrdə müstəqilliyə səs vermiş, indi radikal müxalifətdə olanları da Milli Məclisə dəvət edəydik. Müstəqilliyə səs verənlər və onların ailələrinə prezident təqaüdünün verilməsi də müsbət olardı”.

F. Mustafa onu da əlavə edib ki, Azərbaycan Bakını işğaldan azad etmiş Nuru Paşa məsələsinə həssas yanaşmalıdır: “Ona layiqli qiymət verilməlidir”.

Milli Məclisin İnsan hüquqları komitəsinin sədri Rəbiyyət Aslanova ötən 20 il ərzində Azərbaycanın sosial dövlətə çevrilməyə başladığını vurğulayıb: “Biz indi yeni insanlarıq. 20 il əvvəlki, sabaha ümidi olmayan insanlar deyilik”.

İqbal Ağazadə bəyan edib ki, Azərbaycanın müstəqilliyinin 20 illiyinin qeyd olunması özü nailiyyətdir: “Mən çox istərdim ki, ölkədə vətəndaş sülhü və barış cəmiyyəti yaratmaqla Azərbaycan ərazilərini işğaldan azad edək. Çox istərdim ki, 1991-ci ildə müstəqillikdə rolu olanlara “İstiqlal” ordeni verilsin, bütün problemləri bir masa arxasında çözə biləcək iqtidar-müxalifət birliyi yaransın”.

İ. Ağazadə Heydər Əliyev Fondunun prezidenti, millət vəkili M. Əliyevadan xahiş edib ki, həbsdə olanlara amnistiya verilməsi təklifi ilə çıxış etsin: “Arif Hacılı, Bəxtiyar Hacıyev və Cabbar Savalan daxil olmaqla siyasi məhbuslar, həmçinin ömürlük həbs cəzası almış şəxslər həbsdən azad olunmalıdır”.

Qənirə Paşayeva çıxışında dünyada yüzlərlə xalqın müstəqil dövlətinin olmadığını xatırladıb: “Amma azərbaycanlıların müstəqil dövləti var. Mən o dövrü yaxşı xatırlayıram. O zaman biz gənc idik, tələbə idik. Sabaha ümidlə baxa bilmirdik. Amma bugünkü Azərbaycan gənci sabaha ümidlə baxır. Mən dünyanın hər yerindəki soydaşlarımıza səslənirəm ki, Azərbaycanın güclənməsi üçün çalışsınlar. Bu gün Azərbaycanın müstəqilliyini, inkişafını qəbul edənlərlə yanaşı, Azərbaycanı istəməyənlər də var. Gənclik keçmişimizi yaxşı öyrənməli, bu günümüzə sahib çıxıb ölkəmizin inkişafında rol oynamalıdır”.

Mili Məclisin Hüquq siyasəti və dövlət quruculuğu komitəsinin sədri Əli Hüseynli deyib ki, 90-cı illərin əvvəllərində müstəqillik əldə edən Azərbaycan qədər heç bir sovet respublikası itki verməyib: “Xalqımız bu itkilərə səbəb olanları bağışlamayacaq. Biz onları bağışlasaq da, şəhidlərimizin ruhları onları bağışlamayacaq”.

Deputatlar Rafael Cəbrayılov, Elton Məmmədov, Fəzail İbrahimli, Jalə Əliyeva, Siyavuş Novruzov da ölkənin müstəqillik dövründə qazandığı uğurlardan danışıblar.

milli_məclis