Daxili siyasət

Daxili siyasət

Əli Kərimli: “Müxalifətin inteqrasiyası üçün ən yaxşı model İctimai Palatadır”

19 oktyabr 2011 09:17 (UTC +04:00)

Bakı. Ramil Məmmədli - APA. “Müxalifət partiyalarının toplaşdığı yeni təşkilatın yaradılmasına ehtiyac duymuruq. Bütün müxalifət nümayəndələrini İctimai Palataya dəvət edirik”. Bunu APA-ya açıqlamasında AXCP sədri Əli Kərimli deyib.

Ə. Kərimli bildirib ki, AXCP bir ilə yaxındır, əsasən İctimai Palata daxilində fəaliyyət göstərir: “Bu qurum vətəndaş hərəkatıdır və hər bir şəxs ora fərdi şəkildə qəbul olunur”. İP-də AXCP-nin Müsavat Partiyasının və daha 8 partiyanın nümayəndələrinin təmsil olunduğunu diqqətə çatdıran AXCP sədrinin fikrincə, hazırkı mərhələdə müxalifət düşərgəsinin birgə müzakirələr aparması üçün adıçəkilən qurum ən yaxşı formatdır: “Biz ilk növbədə İctimai Palatanın aprel ayından başladığı mübarizə nəticəsində tutulanların müdafiəsi ilə məşğul oluruq. Digər tərəfdən, İctimai Palata ötən müddətdə xeyli strukturlaşıb, komissiyalarını formalaşdırıb, regionların yarından çoxunda artıq təşkilatlanıb. Bu fəaliyyət minlərlə insanı əhatə edir və beynəlxalq təşkilatlar tərəfindən tanınır. Azərbaycanda beynəlxalq korpusu təmsil edən 20-yə qədər diplomat iki dəfə İctimai Palata rəhbərliyi ilə görüşlər keçirib. Beynəlxalq sənədlərdə də İctimai Palatanın adı keçir”.

Ə. Kərimli İP-i hazır və artıq qurulmuş bir təşkilat olduğunu da söyləyərək, İP-dən kənarda qalan partiyalara ismarış da göndərib: “Biz digər dostlarımızı da dəvət etmişik ki, İctimai Palata təmsil olunsunlar. Mövqeyimiz aydındır və müxalifətdaxili inteqrasiya tərəfdarıyıq. İnteqrasiya üçün ən yaxşı modeli kimi isə İctimai Palatanı görürük”.

Qeyd edək ki, Azərbaycan Demokrat Partiyasının (ADP) sədri Sərdar Cəlaloğlu APA-ya açıqlamasında bildirib ki, İctimai Palatada ictimai təşkilatlar və Yeni Azərbaycan Partiyalarının üzvləri təmsil olunduğuna görə, bu təşkilatı müxalifətin güc mərkəzi kimi təqdim etmək olmaz: “Müsavat Partiyası və AXCP birgə müzakirələrdən bəhanələrlə yayınır”.

Xatırladaq ki, Vətəndaş Hərəkatı Forumunun təşəbbüsü ilə Vətəndaş və İnkişaf, Liberal, Klassik Xalq Cəbhəsi, Demokrat və Ümid partiyalarının liderləri arasında müxalifətin inteqrasiyası istiqamətində görüşlər keçirilir.

İP