Daxili siyasət

Daxili siyasət

Azərbaycan Milli Məclisi «Prokurorluq haqqında» qanuna dəyişikliklər edib

25 oktyabr 2011 13:23 (UTC +04:00)

Bakı. Rəşad Süleymanov – APA. Azərbaycan Milli Məclisi «Prokurorluq haqqında» qanuna dəyişikliklər edib. APA-nın məlumatına görə, dəyişikliklər layihəsi parlamentin bu gün keçirilən iclasında müzakirəyə çıxarılaraq qəbul edilib.

Dəyişikliklərə uyğun olaraq qanuna «əməliyyatçı» anlayışı salınıb. Sənədə, həmçinin prokurorluğun fəaliyyət istiqamətlərinə korrupsiya ilə bağlı cinayət üzrə cinayət işinin başlanılmasını və istintaqının aparılmasını təmin etmək məqsədi ilə əməliyyat-axtarış fəaliyyəti həyata keçirmək daxil edilib.

Qanunla Azərbaycan Respublikasının Baş Prokurorluğunun strukturunda idarə və şöbələrin tərkibinə idarə rəisləri, idarə rəislərinin müavinləri və şöbə rəisləri ilə yanaşı, əlavə olaraq prokurorlar, müstəntiqlər və əməliyyatçılar daxil edilib.

Başqa bir dəyişikliklə prokurorluğun müstəntiqlərinin və əməliyyatçılarının xüsusi və ya hərbi rütbələri Azərbaycan Silahlı Qüvvələri hərbi qulluqçularının və müvafiq icra hakimiyyəti orqanları əməkdaşlarının qanunvericiliklə müəyyən edilmiş müvafiq hərbi və xüsusi rütbələrinə bərabər tutulur.

Milli Məclis bununla yanaşı “Prokurorluq orqanlarında qulluq keçmə haqqında”, “Əməliyyat-axtarış fəaliyyəti haqqında” qanuna dəyişiklikləri də təsdiqləyib.

“Əməliyyat-axtarış fəaliyyəti haqqında” qanuna edilmiş dəyişikliyə əsasən, əməliyyat-axtarış tədbirlərinin təşkili, taktikası, üsul və vasitələrinə dair məlumatlar korrupsiyaya qarşı mübarizə sahəsində ixtisaslaşmış prokurorluq orqanının əməliyyat-axtarış tədbirləri ilə bağlı məlumatları istisna olmaqla prokuror nəzarətinin predmetinə daxil edilmir.

Millət vəkili Qüdrət Həsənquliyev qeyd edib ki, bu gün Azərbaycanda 8 qurumun istintaq idarəsi var. Bunların birləşdirilib vahid istintaq komitəsinin yaradılmasına ehtiyac var.

Parlament «Cinayət mühakimə icraatının iştirakçılarının müdafiəsi haqqında» beynəlxalq sazişi də təsdiqləyib.