Daxili siyasət

Daxili siyasət

“Bələdiyyələrin statusu haqqında” qanuna dəyişiklik edilib

25 oktyabr 2011 14:03 (UTC +04:00)

Bakı. Rəşad Süleymanov – APA. Milli Məclis “Bələdiyyələrin statusu haqqında” qanuna dəyişiklik edib. APA-nın xəbərinə görə, qanun layihəsi barədə parlamentin Regional məsələlər komitəsinin sədri Arif Rəhimzadə məlumat verib.

Dəyişiklik əsasında bələdiyyələr beynəlxalq əlaqələr qurmaq hüququ əldə edib. Başqa bir dəyişikliklə öz səlahiyyətlərini daimi əsaslarla icra edən bələdiyyə üzvləri bələdiyyə büdcəsindən məvacib ala biləcəklər. Onlara elmi və pedaqoji fəaliyyətdən başqa vəzifə tutmaq qadağan olunur. 5-7 üzvü olan bələdiyyələrdə 2 üzv, 9-11 üzvü olan bələdiyyədə 3 üzv, 13-15 üzvü olan bələdiyyədə 4 üzv, 17-19 üzvü olan bələdiyyədə 5 üzv bələdiyyə büdcəsindən məvacib ala bilər.

Digər dəyişiklik bələdiyyə üzvlərinin səlahiyyətlərinə xitam verilməsi ilə bağlıdır. Dəyişikliyə əsasən ardıcıl olaraq 3 dəfə bələdiyyə iclaslarını üzürsüz səbəbdən buraxan və ya il ərzində keçirilən iclasların yarısından çoxunda üzürsüz səbəbdən iştirak etməyən bələdiyyə üzvünün səlahiyyətinə xitam verilə bilər.

Parlament “Bələdiyyələrin maliyyəsinin əsasları haqqında“ qanuna da dəyişiklik edib. Dəyişikliyə əsasən bələdiyyələr öz nizamnaməsində müəyyən edilmiş qaydada yerli büdcənin icrası haqqında illik hesabatı təsdiq etməli və yerli əhalini tanış etmək məqsədilə həmin hesabatı müxtəlif vasitələrlə (elan, bülleten, vərəqə, yerli mətbuat, internet saytları və s) onlara çatdırmalıdır.

“Bələdiyyələrin fəaliyyətinə inzibati nəzarət haqqında“ qanuna dəyişikliyə əsasən qüvvəyə minmiş bələdiyyə aktları əhaliyə elan edilməli və bələdiyyə binasının qarşısında xüsusi lövhələrdə yerləşdirilməlidir.

“Bələdiyyə torpaqlarının idarə edilməsi haqqında“ qanuna edilmiş əlavələrə əsasən ümumi istifadədə olan küçələr, meydanlar, yerli əhəmiyyətli və təsərrüfatdaxili yollar, parklar, meşə-parklar, bulvar, çimərlik, sahil, keçid, sututarları, stadionlar və idman meydançalarının altındakı torpaqlar, tarlaqoruyucu meşə zolaqları, yerli əhəmiyyətli su təsərrüfatı obyektləri, hidrotexniki qurğular, ümumi istifadədə olan yerli əhəmiyyətli obyekt və qurğuların yerləşdiyi torpaqlar, əhalinin mal-qarası üçün istifadə olunan örüş sahələrinin torpaqları xüsusi mülkiyyətə verilə bilməz.

Mili Məclis həmçinin “Bələdiyyələrin daimi və başqa komissiyaları haqqında“ Əsasnaməyə, “Bələdiyyələrin fəaliyyətinə inzibati nəzarət haqqında” və “Bələdiyyə qulluğu haqqında“ qanuna dəyişiklikləri də təsdiqləyib.

milli_məclis