Daxili siyasət

Ana səhifə

Daxili siyasət

Azərbaycanda MDB dövlətləri Təhlükəsizlik və Xüsusi Xidmət Orqanları Rəhbərləri Şurasının iclası keçirilib

27 oktyabr 2011 15:42 (UTC +04:00)

Milli Təhlükəsizlik Nazirliyi İctimai Əlaqələr Mərkəzindən APA-ya verilən məlumata görə, iclasda MDB iştirakçı dövlətlərin təhlükəsizlik və xüsusi xidmət orqanlarının, həmçinin MDB Antiterror Mərkəzinin nümayəndə heyətləri iştirak edib.

Beynəlxalq təhlükəsizliyin təmin olunmasında tərəfdaşlıq münasibətlərinin daha da möhkəmləndirilməsi üçün Şura üzvlərinin qərarı ilə tədbirdə müşahidəçi qismində Almaniya, İtaliya və Fransanın müvafiq strukturlarının məsul vəzifəli nümayəndələri də təmsil olunublar.

Tədbir iştirakçıları və general-leytenant Eldar Mahmudov başda olmaqla MTN-in rəhbər heyəti Fəxri xiyabanda Heydər Əliyevin və akademik Zərifə Əliyevanın məzarını, sonra isə Şəhidlər xiyabanını ziyarət ediblər.

Oktyabrın 27-də işinə başlayan iclası giriş sözü ilə general-leytenant Eldar Mahmudov açıb. Baş nazir Artur Rasizadə Azərbaycan prezidenti İlham Əliyevin adından qonaqları salamlayıb, dövlət başçısının tədbir iştirakçılarına təbriklərini çatdırıb, iclasın təhlükəsizlik üzrə əməkdaşlıq münasibətlərinin möhkəmləndirilməsi işində əhəmiyyətini qeyd edib.

Daha sonra çıxış edən nazir E. Mahmudov MDB iştirakçı dövlətlərin Təhlükəsizlik və Xüsusi Xidmət Orqanları Rəhbərləri Şurasının iclasında ümumi təhlükəsizlik əleyhinə yönəlmiş təhdidlərin, o cümlədən terrorçuluq, ekstremizm və transmilli mütəşəkkil cinayətkarlığın digər növlərinin qarşısının alınması üzrə aktuallıq kəsb edən məsələlərin bu formatda müzakirəsinin regional və beynəlxalq təhlükəsizliyin təmin olunmasına konkret töhfələr verəcəyinə əminliyini bildirib.

MDB İcraiyyə Komitəsinin sədri-icra katibi Sergey Lebedev nümayəndə heyətlərinin Azərbaycan prezidenti ilə görüşünün yüksək təəssürat doğurduğunu bildirib, iştirakçı dövlətlərin son 20 ildə çox böyük tərəqqi yolu keçdiyini, hər bir ölkənin milli maraqlarına cavab verən tərəfdaşlıq münasibətlərinin daha da inkişaf etdirilməsinə MDB dövlət başçılarının xüsusi önəm verdiklərini qeyd edib.

MDB iştirakçı dövlətlərin Təhlükəsizlik və Xüsusi Xidmət Orqanları Rəhbərləri Şurasının sədri, Rusiya Federal Təhlükəsizlik Xidmətinin direktoru, ordu generalı Aleksandr Bortnikovun rəhbərliyi ilə işini davam etdirən iclasda terrorçuluq və hər cür ekstremist təzahürlərlə mübarizənin təkmilləşdirilməsi məsələləri, eləcə də təhlükəsizlik və xüsusi xidmət orqanlarının səlahiyyətlərinə aid edilmiş cinayətlər üzrə təhqiqat və ibtidai istintaqın aparılması sahəsində əməkdaşlıq perspektivləri müzakirə olunub.

Bundan başqa, transmilli mütəşəkkil cinayətkarlıqla, o cümlədən narkotik vasitələrin qanunsuz dövriyyəsi, qeyri-qanuni miqrasiya, kiber cinayətlər və digər hüquqazidd əməllərə qarşı mübarizədə əməkdaşlığın fəallaşdırılması və təkmilləşdirilməsi yolları, qarşılıqlı əməliyyat məlumatı mübadiləsi və maraq doğuran digər məsələlər ətrafında müzakirələr aparılıb.

Tədbir çərçivəsində Təhlükəsizlik və Xüsusi Xidmət Orqanları Rəhbərləri Şurası yanında Elmi-texniki əməkdaşlıq üzrə Komissiyanın, həmçinin Narkotik vasitələrin və psixotrop maddələrin qanunsuz beynəlxalq dövriyyəsi ilə mübarizə üzrə Komissiyanın ekspert iclasları keçirilib.

İclasın sonunda gündəlikdəki məsələlər üzrə müvafiq qərarlar imzalanıb, Şuranın gələn il üçün fəaliyyət Planı təsdiq edilib, MDB Antiterror Mərkəzinin 2012-ci il üçün nəzərdə tutulan tədbirlər siyahısı razılaşdırılıb.

MDB iştirakçı dövlətlərin Təhlükəsizlik və Xüsusi Xidmət Orqanları Rəhbərləri Şurasının növbəti iclasının gələn il Moldovada keçirilməsi qərara alınıb.

MTN