Daxili siyasət

Daxili siyasət

Azərbaycanın İnsan Alverinə Qarşı Mübarizə üzrə Milli Koordinatoru Milli Məclisdə hesabat verib

28 oktyabr 2011 09:20 (UTC +04:00)

APA-nın məlumatına görə, sənədi parlamentə milli koordinator, daxili işlər nazirinin müavini Vilayət Eyvazov təqdim edib.

Ötən dövrdə Azərbaycanda insan alveri ilə mübarizə sahəsində görülən işlər barədə məlumat verən V. Eyvazov bildirib ki, cari ilin 9 ayında Azərbaycanda keçirilmiş əməliyyat-profilaktik tədbirlərlə insan alveri ilə bağlı 70 fakt qeydə alınıb, 4 cinayətkar qrup zərərsizləşdirilib. Keçirilmiş əməliyyat nəticəsində həmin cinayətləri törətmiş 17 nəfər saxlanılıb, insan alverinin qurbanı olan 27 nəfər müəyyən olunub. Bu növ hüquqazidd əməllərə görə beynəlxalq axtarışa verilmiş şəxslərdən 3 nəfər İnterpol xətti ilə tutularaq istintaq orqanlarına təhvil verilib. Hazırda 17 nəfərin axtarışı davam etdirilir.

Hesabat dövründə «Qaynar xətt» telefon xidmətinə insan alveri, əxlaqsızlıq yuvaları saxlama, xarici ölkələrdə işə düzəltmə, təhsil, əcnəbilərlə nikahdan ortaya çıxan problemlərlə bağlı 12 minə yaxın zəng daxil olub.

«Araşdırmalar göstərir ki, Azərbaycan müvafiq qurbanlar üçün əsasən mənbə ölkəsidir. İnsan alveri qurbanlarından 17 nəfəri Türkiyəyə, 5 nəfəri İrana, 2 nəfəri Birləşmiş Ərəb Əmirliklərinə, daha 2 nəfəri Rusiyaya aparılıb. Müəyyən edilmiş 27 qurbandan 3-ü təhsilsiz, 3-ü natamam orta, 21-i orta təhsillidir. İstismara qalan qurbanlardan 14-ü 25-35 yaş həddində, 25-i subay olub. Bu müddətdə insan alverinin 18 qurbanı öz arzusu ilə təhlükəsiz sığınacağa yerləşdirilib», - deyə V. Eyvazov vurğulayıb.

Milli koordinator, həmçinin əlavə edib ki, insan alveri ilə yanaşı, valideyn himayəsindən məhrum olmuş və baxımsız qalan uşaqların müəyyən edilməsi və onların qeydiyyata alınması istiqamətində tədbirlər davam etdirilib. Bu ilin 9 ayında aşkar edilmiş bu qəbildən olan uşaqlardan 3-ü şəxsiyyət vəsiqəsi, 10-u doğum haqqında şəhadətnamə, habelə insan alverinin qurbanı və potensial qurban olan 46 nəfər şəxsiyyəti təsdiq edən sənədlə təmin olunub.

Azərbaycanda vətəndaşların məcburi əməyə cəlb edilməsi ilə bağlı bir sıra müraciətlər olub. V. Eyvazov deyib ki, lakin araşdırmalar zamanı bunlar öz təsdiqini tapmayıb.

Bildirilib ki, hesabat dövründə Dövlət Əmək Müfəttişliyi, Dövlət Miqrasiya Xidməti, Azərbaycan Sahibkarlar Konfederasiyası və QHT-lərlə birgə ayrı-ayrı vaxtlarda müxtəlif tikinti şirkətlərində və daş karxanalarında məcburi əməyə məruz qalma hallarının müəyyən edilməsi üçün monitorinqlər aparılıb. Tikinti təhlükəsizliyi və qeydiyyat qaydalarının, habelə əmək qanunvericiliyinin tələblərinin pozulması halları aşkarlanaraq, aidiyyəti şəxslər barədə müvafiq tədbirlərin görülməsi təmin edilib.

Hesabatla bağlı müzakirələr başlanıb.

MM _ insan alveri