Daxili siyasət

Ana səhifə

Daxili siyasət

Azərbaycanda “Yol hərəkəti haqqında” qanuna dəyişiklik edilir

28 oktyabr 2011 15:23 (UTC +04:00)

Bakı. Rəşad Süleymanov – APA. Azərbaycanda “Yol hərəkəti haqqında” qanuna dəyişikliklər təklif olunur. APA-nın məlumatına görə, Milli Məclisin Hüquq siyasəti və dövlət quruculuğu Komitəsinin bu gün keçirilən iclasında dəyişikliklər layihəsi müzakirə edilərək parlamentin plenar iclasına tövsiyə edilib. Sözügedən qanuna dəyişikliklə əlaqədar olaraq İnzibati Xətalar Məcəlləsinə də müvafiq dəyişikliklər layihəsində də baxılıb. “Yol hərəkəti haqqında” qanuna dəyişikliklərdən biri nəqliyyat vasitəsinin dövlət qeydiyyatının aparılması və daimi uçota alınması, nəqliyyat vasitəsinin qeydiyyat şəhadətnaməsinin və dövlət qeydiyyat nişanının verilməsi ilə bağlıdır. Layihədə qeyd olunur ki, nəqliyyat vasitəsinin dövlət qeydiyyatının və daimi uçota alınmasının, qeydiyyat şəhadətnaməsinin və dövlət qeydiyyat nişanının alınması ilə bağlı internet vasitəsilə elektron formada müraciət etmə imkanı və həmin şəxsin növbəsi barədə (tarix və vaxt göstərilməklə) eyni qaydada məlumat verilməlidir. Sənədə əsasən, nəqliyyat vasitəsinin dövlət qeydiyyatını və daimi uçota alınmasını, qeydiyyat şəhadətnaməsi və dövlət qeydiyyat nişanının verilməsi ilə bağlı həmin fəaliyyəti həyata keçirən dövlət orqanında “bir pəncərə” prinsipi, dövlət rüsumunun, verginin yalnız banka, poçt, plastik kart və ya internet vasitəsi ilə ödənilməsi təmin olunmalıdır.

Başqa bir dəyişiklikdə isə bildirilib ki, dövlət qeydiyyat nişanında əks olunmuş rəqəmlərin və ya hərflərin kombinasiyası üzrə dövlət qeydiyyat nişanlarının verilməsinə görə, dövlət rüsumunun məbləği, mövcud olan rəqəm və ya hərf kombinasiyaları barədə məlumatlar müvafiq icra hakimiyyəti orqanının internet səhifəsində yerləşdirilməlidir. Mövcud olan rəqəm və ya hərf kombinasiyaları barədə məlumatların öyrənilməsinə və dövlət rüsumunun ödənilməsinə imkan verən istifadəsi sadə olan elektron avadanlıqlar həmin orqanın imtahan-qeydiyyat məntəqələrində və digər yerlərdə quraşdırılmalıdır.

Nəqliyyat vasitəsinə texniki baxışın keçirilməsi ilə bağlı qanuna təklif olunan dəyişikliyə görə, texniki baxışın keçirilməsi üçün internet vasitəsilə elektron formada müraciət etmə və münasib vaxtı seçmək imkanının yaradılması, habelə nəqliyyat vasitəsinin texniki baxışın keçirilməsi barədə vaxtı və tarixi göstərilməklə müraciət edən şəxsə məlumatın verilməsi təmin olunmalıdır.

Sürücülük vəsiqəsi almaq istəyənlər üçün də qanuna bəzi dəyişikliklər təklif olunub. Belə ki, qanuna dəyişikliklər qəbul olunarsa, sürücülük vəsiqəsini almaq istəyən hər bir şəxs yol hərəkəti qaydaları üzrə nəzəri və nəqliyyat vasitələrini idarəetmə vərdişləri üzrə təcrübi imtahanlara müstəqil hazırlaşa bilər və ya nəqliyyat vasitələri sürücülərinin hazırlanması kursunda hazırlıq keçə bilər. “A1”, “A” və “B” kateqoriyalarına aid nəqliyyat vasitələri istisna olmaqla, digər kateqoriyalara aid nəqliyyat vasitələrinin idarə edilməsi üçün sürücülük vəsiqəsini almaq istəyən hər bir şəxs nəqliyyat vasitələri sürücülərinin hazırlanması və onların ixtisasının artırılması kursunda hazırlıq keçməlidir. Sürücülük vəsiqəsi almaq istəyən, müstəqil hazırlıq keçən şəxslər istisna olmaqla, digər şəxslər üçün müvafiq kateqoriyalı nəqliyyat vasitələri sürücülərinin hazırlanması üzrə tədris planlarında və proqramlarında nəzərdə tutulan həcmdə hazırlıq keçmələri barədə təhsil müəssisəsinin sənəd təqdim etməlidir.

Vətəndaş sürücülük vəsiqəsi almaq üçün sənədləri bilavasitə və ya internet vasitəsilə təqdim edə biləcək. İmtahanların qəbulu və sürücülük vəsiqəsinin verilməsi zamanı dövlət rüsumu yalnız bank, poçt, plastik kart və ya internet vasitəsi ilə ödənilməsi, sənədlərin qəbulu və verilməsi, həmçinin imtahan prosesini interaktiv şəkildə əks etdirən monitorlar, o cümlədən imtahan zalında videokamera yerləşdirilməsi, nəzəri imtahanın informasiya-kommunikasiya texnologiyaları vasitəsilə verilməsi, nəqliyyat vasitələrini idarəetmə vərdişləri üzrə təcrübi imtahanların qəbulunda növbələri istisna edəcək sayda və imtahan verilən gün istehsal tarixi beş ildən artıq olmayan nəqliyyat vasitələrində istifadə məsələləri də dəyişiklik layihəsində öz əksini tapıb.

Qanuna təklif olunan dəyişikliklərdən biri isə digəri nəqliyyat vasitəsini idarə etmə hüququnun məhdudlaşdırılması müddəti qurtardıqda sürücülük vəsiqəsinin qaytarılması ilə bağlıdır. Bunun üçün sürücülük vəsiqəsi nəqliyyat vasitəsini idarə etmə hüququ bir ildən çox müddətə məhdudlaşdırılmış şəxslərə nəqliyyat vasitəsini idarəetmə vərdişləri üzrə təcrübi imtahanı müvəffəqiyyətlə verdiyi gün, bir il və daha az müddətə məhdudlaşdırılmış şəxslərə imtahansız, həmin müddət bitdiyi gün qaytarılmalıdır.

Yol hərəkəti _ qanuna dəyişiklik