Daxili siyasət

Daxili siyasət

Sərdar Cəlaloğlu: “İctimai Palata da, biz də öz fikrimizi hər dəqiqə dəyişə bilərik”

31 oktyabr 2011 14:09 (UTC +04:00)

Bakı. Ramil Məmmədli-APA. “Müxalifətdəki beş partiyanın qatıldığı müzakirələrdə iştirak etməklə bağlı İctimai Palatanın da fikrində dəyişikliyin olacağına ümid etmək təbiidir və gözləniləndir”.

Bu sözləri APA-ya açıqlamasında Azərbaycan Demokrat Partiyasının (ADP) sədri Sərdar Cəlaloğlu deyib. “İctimai Palatanın 5 partiyanın qatıldığı müzakirələrə cəlb edilməsi istiqamətində fəaliyyət davam etdiriləcəkmi?” sualını cavablandıran ADP sədri müxalifətin inteqrasiyası istiqamətində müsbət nəticələrə nail olacağına ümidvar olduğunu deyib: “Belə bir söz var: “Bir dəlilər, bir də ölülər fikirlərini dəyişmir”. Amma siyasi həyat çay kimi axır və hər şey dəyişir. Ona görə də İctimai Palata da, biz də öz fikrimizi hər dəqiqə dəyişə bilərik. Burada belə bir məsələ yoxdur. Onların dedikləri hazırkı fikirlər indiki vəziyyətə hesablanıb və mövcud həqiqətin göstəricisidir”.

İctimai Palatanın həmtəsisçisi, Müsavat Partiyası başqanının müavini Gülağa Aslanlı isə deyib ki, təmsil etdiyi qurumun mövqeyi real müxalifət qüvvələrinin birliyini özündə ehtiva edir: “İctimai Palata real müxalifətin və narazı qüvvələrin birlikdə olması üçün ən yaxşı formatdır və bunu qəbul edən insanların bu formatda birləşməsini arzu edirik. Sərdar Cəlaloğlu kimin nədə dəyişiklik edəyəcəyini düşünür. Əlbəttə, bu həyat dinamizmlə doludur. Hadisələrə uyğun olaraq, dəyişikliklər ortaya çıxa bilər. Əsas məsələ həmişə bu dəyişikliyə hazır olmaq və ən əsası haqqın yanında olmağı bacarmaqdır”.

G. Aslanlı müxalifətdə olan bəzi partiyalara da mesaj göndərməyi unutmayıb: “O partiyalar tənqid edə bilərlər ki, özləri nə isə iş görürlər. Yoxsa, heç bir iş görməyib, sadəcə müxalifəti tənqid etmək düzgün deyil. Bəzi qüvvələr müxalifəti tənqid etməyi özlərinə siyasi xətt kimi götürüblər. Hakimiyyətin tənqidini ikinci-üçüncü plana saxlayırlar. Bu da ümumi birliyə xeyir gətirən hal deyil”.

Qeyd edək ki, Vətəndaş Hərəkatı Forumunun təşəbbüsü ilə hazırda Vətəndaş və İnkişaf, Liberal, Klassik Xalq Cəbhəsi, Demokrat və Ümid partiyalarının sədrləri arasında danışıqlar gedir.