Daxili siyasət

Daxili siyasət

KXCP: Sosial vəziyyəti aşağı olan təbəqənin də məvacibləri və təqaüdləri artırılmalıdır

31 oktyabr 2011 15:27 (UTC +04:00)

Bakı. Ramil Məmmədli – APA. Klassik Xalq Cəbhəsi Partiyası (KXCP) İdarə Heyətinin növbəti toplantısı keçirilib. Partiyanın mətbuat xidmətindən APA-ya verilən məlumata görə, toplantıda Ali Məclisin sessiyasının nəticələri və qəbul olunan qərarların icrası məsələləri müzakirə olunub.

İdarə Heyəti dövlət başçısının Daxili İşlər və Fövqəladə Hallar nazirliklərinin işçilərinin vəzifəyə və rütbəyə görə maaşlarının 30% artırılması haqda imzaladığı sərəncamla bağlı bəyanat qəbul edib. Bəyanatda bildirilir ki, KXCP vətəndaşların həyat səviyyəsi və sosial rifahının artmasını alqışlayır və dəstəkləyir: “Belə qərarların ilk növbədə sosial durumu və həyat təminatı daha aşağı səviyyədə olan əhali qrupuna və çalışanlara da şamil edilməsi vacibdir. Nəyəsə görə bu təbəqədən olan çalışanlara artım 10-15 %-dən artıq olmur”. Bəyanatda sosial vəziyyəti aşağı olan işçilərin də məvaciblərinin və təqaüdlərinin artırılmasının vacibliyi vurğulanıb.

Toplantıda “Xural” qezetinin baş redaktoru Əvəz Zeynallının həbsi pislənərək onun müdafiəsi üçün KİV, QHT nümayəndələrinin, hüquq müdafiəçilərinin iştirakı ilə vahid mərkəzdən müvafiq tədbirlərin görülməsi qərara alınıb və bu məqsədlə partiya funksionerlərinə lazımi tapşırıqlar verilib.