Daxili siyasət

Daxili siyasət

“Avropa İttifaqına inteqrasiyada Avronest Parlament Assambleyasi və vətəndaş cəmiyyəti qurumlarının rolu” mövzusunda konfrans keçirilib

04 noyabr 2011 08:33 (UTC +04:00)

Bakı. Pərvin Abbasov – APA. Bakıda “Avropa İttifaqına inteqrasiyada Avronest Parlament Assambleyasi və vətəndaş cəmiyyəti qurumlarının rolu” mövzusunda konfrans keçirilib. APA-nın məlumatına görə, Milli Məclisin Hüquq siyasəti və dövlət quruculuğu komitəsinin sədri Əli Hüseynli açılış nitqində bildirib ki, avrointeqrasiya Azərbaycanın öz seçimidir: “Azərbaycan Avropa İttifaqı ölkələrinin inkişaf modelinə üstünlük verir”.

Ə. Hüseynli deyib ki, bu konfrans 29-30 sentyabrda “Şərq Tərəfdaşlığı” proqramının Varşava sammitindən sonra ilk tədbirdir: “Bu tədbiri keçirməklə Azərbaycan həm də Varşava sammitində öz üzərinə götürdüyü öhdəliyi yerinə yetirmiş olur”.

Avronest Parlament Assambleyasında Azərbaycan nümayəndə heyətinin rəhbəri, Azərbaycanda Vətəndaş Cəmiyyətinin İnkişafına Yardım
Assosiasiyasının sədri Elxan Süleymanov da Avropa İttifaqına inteqrasiyanın Azərbaycanın əsas məqsədlərindən biri olduğunu və bu istiqamətdə irəliləyişlərə nail olunduğunu söyləyib: “Ötən 20 ildə Azərbaycanla Aİ arasında münasibətlər dinamik inkişaf edib”.

E. Süleymanov qeyd edib ki, Avronest Parlament Assambleyası “Şərq Tərəfdaşlığı” ölkələrinə öz problemlərini dünya ictimaiyyətinə çatdırmaq üçün tribuna verir və Azərbaycan da Dağlıq Qarabağ problemini bu tribunada səsləndirə bilər.

Avrasiya Əməkdaşlıq Fondunun prezidenti Corc Zarubin isə çıxışında bəyan edib ki, Avronest PA Azərbaycan üçün həm də qanunvericilik sahəsində Avropaya inteqrasiya üçün imkanlar yaradır.

Konfransda Avronest Parlament Assambleyasında Azərbaycan nümayəndə heyətinin katibi Vüqar Məmmədov “Avronest: Azərbaycanın fəaliyyəti, vətəndaş cəmiyyəti institutları ilə əməkdaşlıq üçün imkanlar”, Azərbaycan Hüquqşünaslar Konfederasiyasının üzvü Sahib Məmmədov “Avropa İttifaqına inteqrasiyada vətəndaş cəmiyyəti institutları və dövlət qurumları arasında dialoq” mövzusunda məruzə ilə çıxış ediblər.

Tədbir müzakirələrlə davam etdirilib.